بىرىككەن ۇلتتار ۇيىمىنىڭ ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسياسى ايماقتاعى 2024 جىلعا ارنالعان ينۆەستيسيا تۋرالى ەسەبىن جاريالادى. ەسەپكە سايكەس، قازاقستان جاڭا جوبالارعا 15،7 ملرد دوللار تارتىپ، سولتۇستىك جانە ورتالىق ازيا ايماعىنداعى ينۆەستيسيا تارتۋ بويىنشا كوشباسشى اتاندى.
2024 جىلدىڭ قورىتىندىسى بويىنشا قازاقستانعا ينۆەستيسيانىڭ ءوسىمى 2023 جىلمەن سالىستىرعاندا 88 پايىزدى قۇرادى. وبلىسقا تارتىلعان بارلىق ينۆەستيسيانىڭ 63 پايىزى ءبىزدىڭ ەلگە تيەسىلى.
ودان كەيىنگى ورىنداردا كەلەسى مەملەكەتتەر ورنالاستى:
وزبەكستان – $4 ملرد (-49%)
قىرعىزستان – $2،1 ملرد (+310%)
ءازىربايجان – $1،2 ملرد (+1%)
تۇركىمەنستان – $339 ملن
گرۋزيا – $126 ملن
ارمەنيا – $67 ملن
باياندامادا ايماقتىڭ ينۆەستيسيالىق احۋالى حالىقارالىق كومپانيالاردىڭ ءوز ستراتەگيالارىن ءارتاراپتاندىرۋعا جانە جاسىل ەنەرگيا، سيفرلاندىرۋ جانە تەحنولوگيالىق يننوۆاسيالار سياقتى نەگىزگى سالالارداعى جوبالاردى قولداۋعا دەگەن ىنتالىلىعىن كورسەتەتىنى اتاپ وتىلگەن.
"بۇل تۇرعىدا ينۆەستيسيالىق اگەنتتىكتەر مەن مۇددەلى مينيسترلىكتەردىڭ بەلسەندى جۇمىسى ەرەكشە ماڭىزدى. جاڭا باعىتتاردىڭ تابىستى بولۋى تەك قولايلى ساياساتتى قۇرۋعا عانا ەمەس، سونىمەن قاتار ينۆەستورلاردى بارلىق كەزەڭدەردەگى قولداۋعا، سونىڭ ىشىندە ينۆەستيسيادان كەيىنگى قولداۋعا دا بايلانىستى"، - دەپ باياندامادا ەسكەرتىلدى.
جاھاندىق سىن-قاتەرلەرگە قاراماستان، قازاقستان تۇراقتى ءوسۋ مەن جاڭا مۇمكىندىكتەر الاڭىنا اينالىپ، ءىرى شەتەلدىك ينۆەستورلاردىڭ نازارىن اۋدارۋدى جالعاستىرۋدا. بيىل ەلدە ءىرى ينۆەستيسيالىق ءىس-شارالار – شەتەلدىك ينۆەستورلار كەڭەسى جانە جاھاندىق ينۆەستيسيالار جونىندەگى قازاقستاندىق دوڭگەلەك ۇستەل - 2024 ءوتتى، بۇل قازاقستاننىڭ وڭىردەگى نەگىزگى ينۆەستيسيالىق حاب رەتىندەگى ۇستانىمىن نىعايتتى.
