رەسەيلىك تاسىمالداۋشىلار قازاقستاندا جۇمىس ىستەۋ قيىنداعانىن ايتىپ، ءبىرقاتار شەكتەۋلەرگە شاعىمداندى. بۇل تۋرالى «اۆتوگرۋزەكس» اسسوسياسياسى مالىمدەدى،- دەپ حابارلايدى Dalanews.kz
قاۋىمداستىق وكىلدەرىنىڭ ايتۋىنشا، سوڭعى ون جىلدا رەسەيلىك كولىك كومپانيالارى قازاقستاندا كولىكتەرىن تىركەۋدى تيىمدىلىگى ءۇشىن ءجيى تاڭداعان. الايدا 2025 جىلدان باستاپ بۇل باعىتتا ءبىرقاتار توسقاۋىل پايدا بولعان.
«اۆتوگرۋزەكس» وكىلى قازاقستاننىڭ جاڭا تالاپتارى ەۋرازيالىق ەكونوميكالىق وداق (ەاەو) اياسىندا جاريالانعان كەدەرگىلەردى جويۋ قاعيداتتارىنا قايشى كەلۋى مۇمكىن دەپ ەسەپتەيدى. رەسەيلىك تاراپ جۇرگىزۋشىلەردىڭ تاپشىلىعىنا، رۇقسات قۇجاتتارى مەن قارجىلاندىرۋعا قولجەتىمدىلىكتىڭ شەكتەۋلى بولۋىنا، سونداي-اق ۇلتتىق زاڭنامالار اراسىنداعى ايىرماشىلىقتارعا نازار اۋدارادى.
اتاپ ايتقاندا، 2025 جىلدان باستاپ قازاقستان شەتەلدىك زاڭدى تۇلعالار مەن ازاماتتارعا تيەسىلى كولىك قۇرالدارىن پايدالانۋعا رۇقسات كارتالارىن بەرۋدى توقتاتتى. سونىمەن قاتار، شەتەلدىك مامانداردى، ونىڭ ىشىندە جۇرگىزۋشىلەردى تارتۋعا شەكتەۋ قويىلىپ، ەاەو-عا مۇشە ەلدەردە بەرىلگەن تاحوگراف كارتالارىن تانۋدان باس تارتتى.
اسسوسياسيانىڭ مالىمدەۋىنشە، ماۋسىم ايىنىڭ سوڭىنان باستاپ قازاقستاندا كولىك كومپانيالارىن جاپپاي تەكسەرۋ باستالعان. ونىڭ ناتيجەسىندە حالىقارالىق تاسىمالدارعا بەرىلگەن رۇقساتتار توقتاتىلعان نەمەسە مۇلدە بەرىلمەگەن جاعدايلار تىركەلگەن.
اتالعان مالىمەتتەرگە جاۋاپ رەتىندە قازاقستان رەسپۋبليكاسىنىڭ كولىك مينيسترلىگى رەسمي تۇسىنىكتەمە بەرىپ، ەلىمىز حالىقارالىق اۆتوكولىك تاسىمالدارىن مەملەكەتتىك رەتتەۋ بارىسىندا ەاەو اياسىنداعى حالىقارالىق شارتتاردىڭ تالاپتارىن قاتاڭ ۇستاناتىنىن اتاپ ءوتتى.
مينيسترلىك ەاەو-عا مۇشە ەلدەرمەن بىرلەسىپ ارتىق اكىمشىلىك كەدەرگىلەردى ازايتۋ جانە جۇكتەردىڭ ەركىن قوزعالىسىن قامتاماسىز ەتۋ بويىنشا تۇراقتى نەگىزدە جۇمىس جۇرگىزىپ جاتقانىن حابارلادى.
«جۇيەلى جانە ۇيلەسىمدى جۇمىستىڭ ناتيجەسىندە وداق ەلدەرى اراسىنداعى جۇك تاسىمالى كولەمىنىڭ وسۋىندە وڭ ديناميكا بايقالۋدا»، – دەلىنگەن مينيسترلىك تاراتقان اقپاراتتا.
قازىرگى ۋاقىتتا كولىك مينيسترلىگى جۇك تاسىمالى نارىعىنىڭ تالاپتارى مەن تاسىمالداۋشىلاردىڭ مۇددەلەرىن ەسكەرە وتىرىپ، حالىقارالىق تاسىمالداردى جۇزەگە اسىرۋ ءتارتىبىن رەتتەيتىن قولدانىستاعى زاڭعا تاۋەلدى نورماتيۆتىك قۇقىقتىق اكتىلەردى وزەكتەندىرۋ جۇمىستارىن جۇرگىزىپ جاتىر.
بۇل ماسەلەلەر الداعى ۋاقىتتا وتەتىن ەاەو ساراپشىلارىنىڭ كەزدەسۋى اياسىندا جان-جاقتى تالقىلانباق.
