Reseilik tasymaldaýshylar Qazaqstanda jumys isteý qiyndaǵanyn aityp, birqatar shekteýlerge shaǵymdandy. Bul týraly «AvtoGrýzEks» assotsiatsiiasy málimdedi,- dep habarlaidy Dalanews.kz
Qaýymdastyq ókilderiniń aitýynsha, sońǵy on jylda reseilik kólik kompaniialary Qazaqstanda kólikterin tirkeýdi tiimdiligi úshin jii tańdaǵan. Alaida 2025 jyldan bastap bul baǵytta birqatar tosqaýyl paida bolǵan.
«AvtoGrýzEks» ókili Qazaqstannyń jańa talaptary Eýraziialyq ekonomikalyq odaq (EAEO) aiasynda jariialanǵan kedergilerdi joiý qaǵidattaryna qaishy kelýi múmkin dep esepteidi. Reseilik tarap júrgizýshilerdiń tapshylyǵyna, ruqsat qujattary men qarjylandyrýǵa qoljetimdiliktiń shekteýli bolýyna, sondai-aq ulttyq zańnamalar arasyndaǵy aiyrmashylyqtarǵa nazar aýdarady.
Atap aitqanda, 2025 jyldan bastap Qazaqstan sheteldik zańdy tulǵalar men azamattarǵa tiesili kólik quraldaryn paidalanýǵa ruqsat kartalaryn berýdi toqtatty. Sonymen qatar, sheteldik mamandardy, onyń ishinde júrgizýshilerdi tartýǵa shekteý qoiylyp, EAEO-ǵa múshe elderde berilgen tahograf kartalaryn tanýdan bas tartty.
Assotsiatsiianyń málimdeýinshe, maýsym aiynyń sońynan bastap Qazaqstanda kólik kompaniialaryn jappai tekserý bastalǵan. Onyń nátijesinde halyqaralyq tasymaldarǵa berilgen ruqsattar toqtatylǵan nemese múlde berilmegen jaǵdailar tirkelgen.
Atalǵan málimetterge jaýap retinde Qazaqstan Respýblikasynyń Kólik ministrligi resmi túsinikteme berip, elimiz halyqaralyq avtokólik tasymaldaryn memlekettik retteý barysynda EAEO aiasyndaǵy halyqaralyq sharttardyń talaptaryn qatań ustanatynyn atap ótti.
Ministrlik EAEO-ǵa múshe eldermen birlesip artyq ákimshilik kedergilerdi azaitý jáne júkterdiń erkin qozǵalysyn qamtamasyz etý boiynsha turaqty negizde jumys júrgizip jatqanyn habarlady.
«Júieli jáne úilesimdi jumystyń nátijesinde odaq elderi arasyndaǵy júk tasymaly kóleminiń ósýinde oń dinamika baiqalýda», – delingen ministrlik taratqan aqparatta.
Qazirgi ýaqytta Kólik ministrligi júk tasymaly naryǵynyń talaptary men tasymaldaýshylardyń múddelerin eskere otyryp, halyqaralyq tasymaldardy júzege asyrý tártibin retteitin qoldanystaǵy zańǵa táýeldi normativtik quqyqtyq aktilerdi ózektendirý jumystaryn júrgizip jatyr.
Bul máseleler aldaǵy ýaqytta ótetin EAEO sarapshylarynyń kezdesýi aiasynda jan-jaqty talqylanbaq.
