قۇجاتتا وداقتاس ەلدەردىڭ اسكەري سالاداعى ارىپتەستىگى ەكى ەلدىڭ شەكارالىق تۇتاستىعىنا سىزات تۇسىرمەيتىنى، كەرىسىنشە، سىرتتان تونەتىن كەز-كەلگەن قاۋىپ-قاتەرگە بىرلەسىپ توتەپ بەرەتىنى ايتىلعان.
«مەملەكەتتىڭ ىشكى ىسىنە تۇمسىق تىقپاۋ، تەرريتوريالىق تۇتاستىقتى ساقتاۋ، وسىنىڭ نەگىزىندەگى حالىقارالىق قۇقىق اياسىندا قاراستىرىلعان تالاپتاردى ورىنداۋ باستى مۇددە» دەلىنگەن قۇجاتتا.
Dalanews وسى رەتتە ساياساتتانۋشى ەدۋارد پولەتايەۆقا حابارلاسىپ، اسكەري ارىپتەستىككە قاتىستى پىكىرىن بىلگەن بولاتىن.
«اسكەري سالاداعى ارىپتەستىك قازىرگى زامان ءۇشىن تاڭسىق دۇنيە ەمەس. ستراتەگيالىق باعىتتا بىرلەسە قيمىلداۋدى قۇپ كورەتىن مەملەكەتتەر اسكەري سالادا تىعىز بايلانىس ورناتىپ، كورگەن-بىلگەن تاجىريبەسىمەن بولىسەدى.
بۇدان ءقاۋىپ كۇتۋدىڭ قاجەتى جوق جانە وسىعان قاتىستى قاڭقۋ سوزدەرگە نازار اۋدارماۋ قاجەت.
رەسەيدىڭ اسكەري سالاداعى تاجىريبەسى تولايىم، وتكەن 30 جىلدا رەسەيدىڭ اسكەري ۋچيليششەلەرىندە 8 مىڭعا جۋىق قازاق وفيسەرى ءتالىم الىپ شىقتى.
بۇگىندەرى ولار ەلىمىزدىڭ شەكاراسىن بەكىتۋگە ءوز ۇلەسىپ قوسىپ وتىرعان جايى بار، ولاردىڭ ءبىلىمى مەن بىلىگى اسكەرىمىزدىڭ ساپاسىن كوتەرۋدە. كەلىسىمشارت اياسىندا ءبىزدىڭ ەل رەسەيدىڭ وزىق ۇلگىدەگى اسكەري تەحنيكالارىنا قول جەتكىزەتىن بولادى»، – دەيدى ساراپشى.
ال اسكەري ارىپتەستىك 10 باعىت بويىنشا ءوربيتىن بولادى. جاڭا قۇجاتتىڭ تەزيستەرىنە ساي:
- بەلگىلى ءبىر تاراپ كومەك سۇراعاندا قاۋىپسىزدىكتى قامتاماسىز ەتۋ ءۇشىن اسكەري كومەك ۇسىنۋ؛
- ايماقتىق قاۋىپ-قاتەرگە بىرلەسە جاۋاپ قاتۋ جانە ونىڭ الدىن-الۋ؛
- اسكەري ءبىلىم مەن عىلىم؛
- لاڭكەستىككە قارسى تۇرۋ؛
- بىتىمگەرشىلىك ميسسياسى؛
- اسكەري سالادا ەكى تاراپقا دا ۇعىنىقتى بولاتىن قۇقىقتىق بازا قالىپتاستىرۋ؛
- مەملەكەتتىك قۇپيانى ساقتاۋ
- ەكى ەلدىڭ اسكەري دەلەگاسيالارىن حالىقارالىق ۇيىمداردىڭ جۇمىستارىنا اتسالىستىرۋ سەكىلدى باعىتتاردان تۇرادى.
ايتا كەتەلىك، جالپى قۇجاتتىڭ نەگىزگى تاريحى 1994 جىلدان باستالادى. ءدال وسى جىلدىڭ ناۋرىزىندا قازاقستان مەن رەسەي ۇكىمەتىنىڭ باسشىلىعى اسكەري ارىپتەستىك تۋرالى كەلىسىمگە قول قويعان ەدى.
ەدۋارد پولەتايەۆتىڭ اتاپ وتكەنىندەي بۇعان دەيىن قۇجاتتا كورسەتىلگەن مىندەتتەر مەن ماقساتتاردىڭ باسىم كوپشىلىگى ورىندالعان. ال بۇل جولعى قۇجات 10 جىلعا جارامدى.
«ەگەر وسى ۋاقىت ارالىعىندا قۇجاتتا كورسەتىلگەن بارلىق تالاپتار، مىندەتتەر ورىندالعان بولسا، ارىپتەستىك اۆتوماتتى تۇردە سوزىلاتىن بولادى. قازاقستان مەن رەسەي تاتۋ كورشىلەر، بۇل تاراپتا قانداي دا ءبىر تۇسىنبەۋشىلىك تۋىنداماۋى ءتيىس»، – دەيدى ساراپشى.
