Qujatta odaqtas elderdiń áskeri saladaǵy áriptestigi eki eldiń shekaralyq tutastyǵyna syzat túsirmeitini, kerisinshe, syrttan tónetin kez-kelgen qaýip-qaterge birlesip tótep beretini aitylǵan.
«Memlekettiń ishki isine tumsyq tyqpaý, territoriialyq tutastyqty saqtaý, osynyń negizindegi halyqaralyq quqyq aiasynda qarastyrylǵan talaptardy oryndaý basty múdde» delingen qujatta.
Dalanews osy rette saiasattanýshy Edýard Poletaevqa habarlasyp, áskeri áriptestikke qatysty pikirin bilgen bolatyn.
«Áskeri saladaǵy áriptestik qazirgi zaman úshin tańsyq dúnie emes. Strategiialyq baǵytta birlese qimyldaýdy qup kóretin memleketter áskeri salada tyǵyz bailanys ornatyp, kórgen-bilgen tájiribesimen bólisedi.
Budan qaýip kútýdiń qajeti joq jáne osyǵan qatysty qańqý sózderge nazar aýdarmaý qajet.
Reseidiń áskeri saladaǵy tájiribesi tolaiym, ótken 30 jylda Reseidiń áskeri ýchilishelerinde 8 myńǵa jýyq qazaq ofitseri tálim alyp shyqty.
Búginderi olar elimizdiń shekarasyn bekitýge óz úlesip qosyp otyrǵan jaiy bar, olardyń bilimi men biligi áskerimizdiń sapasyn kóterýde. Kelisimshart aiasynda bizdiń el Reseidiń ozyq úlgidegi áskeri tehnikalaryna qol jetkizetin bolady», – deidi sarapshy.
Al áskeri áriptestik 10 baǵyt boiynsha órbitin bolady. Jańa qujattyń tezisterine sai:
- Belgili bir tarap kómek suraǵanda qaýipsizdikti qamtamasyz etý úshin áskeri kómek usyný;
- Aimaqtyq qaýip-qaterge birlese jaýap qatý jáne onyń aldyn-alý;
- Áskeri bilim men ǵylym;
- Lańkestikke qarsy turý;
- Bitimgershilik missiiasy;
- Áskeri salada eki tarapqa da uǵynyqty bolatyn quqyqtyq baza qalyptastyrý;
- Memlekettik qupiiany saqtaý
- Eki eldiń áskeri delegatsiialaryn halyqaralyq uiymdardyń jumystaryna atsalystyrý sekildi baǵyttardan turady.
Aita ketelik, jalpy qujattyń negizgi tarihy 1994 jyldan bastalady. Dál osy jyldyń naýryzynda Qazaqstan men Resei úkimetiniń basshylyǵy áskeri áriptestik týraly kelisimge qol qoiǵan edi.
Edýard Poletaevtyń atap ótkenindei buǵan deiin qujatta kórsetilgen mindetter men maqsattardyń basym kópshiligi oryndalǵan. Al bul jolǵy qujat 10 jylǵa jaramdy.
«Eger osy ýaqyt aralyǵynda qujatta kórsetilgen barlyq talaptar, mindetter oryndalǵan bolsa, áriptestik avtomatty túrde sozylatyn bolady. Qazaqstan men Resei tatý kórshiler, bul tarapta qandai da bir túsinbeýshilik týyndamaýy tiis», – deidi sarapshy.
