لينگۆيستيكالىق كوميسسيانىڭ قۇرامى قازاقستان رەسپۋبليكاسى ورتالىق سايلاۋ كوميسسياسىنىڭ 2015 جىلعى 27 اقپانداعى قاۋلىسىنا وزگەرىستەر ەنگىزۋمەن جاڭارتىلدى.
كوميسسيا مۇشەلەرى كوميسسيانىڭ جۇمىسىنا قاتىستى ۇيىمداستىرۋ ماسەلەلەرىن، "قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءراسىمى تۋرالى" ورتسايلاۋكومنىڭ 2005 جىلعى 31 تامىزداعى قاۋلىسىمەن ايقىندالاتىن قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءراسىمىن تالقىلادى.
وسى قاۋلىعا سايكەس مەملەكەتتىك ءتىلدى ەركىن مەڭگەرگەندىگىن انىقتاۋ ءۇشىن:
1) لينگۆيستيكالىق كوميسسيا ۇسىنعان تاقىرىپقا كولەمى ەكى بەتتەن اسپايتىن جازباشا تاپسىرما جازۋ؛
2) لينگۆيستيكالىق كوميسسيا ۇسىنعان كولەمى ءۇش بەتتەن اسپايتىن باسپا ءماتىنىن وقۋ؛
3) لينگۆيستيكالىق كوميسسيا بەرگەن تاقىرىپقا كوپشىلىك الدىندا ءسوز سويلەۋ كەمىندە ون بەس مينۋت.
لينگۆيستيكالىق كوميسسيانىڭ وتىرىسىنا ونىڭ مۇشەلەرى مەن قازاقستان رەسپۋبليكاسىنىڭ پرەزيدەنتتىگىنە كانديداتتان باسقا، قازاقستان رەسپۋبليكاسى ورتالىق سايلاۋ كوميسسياسىنىڭ مۇشەلەرى بايقاۋشىلار رەتىندە قاتىسۋعا قۇقىلى.
- لينگۆيستيكالىق كوميسسيانىڭ شەشىمى كوميسسيا مۇشەلەرى سانىنىڭ كوپشىلىك داۋسىمەن اشىق داۋىس بەرۋ ارقىلى قابىلدانادى، وتىرىس حاتتاماسىمەن رەسىمدەلەدى جانە وتىرىسقا قاتىسىپ وتىرعان قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسىنە دەرەۋ بەرىلەدى، - دەپ حابارلاپ وتىر وسك.
لينگۆيستيكالىق كوميسسيا مۇشەلەرى كوميسسيانىڭ جۇمىسى اشىق جانە جاريالى تۇردە جۇزەگە اسىرىلاتىنىن، ال بۇقارالىق اقپارات قۇرالدارى كانديداتتاردىڭ ءارقايسىسى بويىنشا شەشىم قابىلداۋ پروسەسىن بايقاۋعا مۇمكىندىك الاتىنىن اتاپ ءوتتى.
