قازاقستان پاسپورتى Henley Passport Index جاھاندىق رەيتينگىندە ءوز پوزيسياسىن جاقسارتتى. 2026 جىلعى جاڭارتىلعان دەرەك بويىنشا ەل 57-ورىنعا كوتەرىلدى، ال قازاقستان ازاماتتارى 78 ەلگە ۆيزاسىز بارا الادى، دەپ حابارلايدى Dalanews.kz.
Henley & Partners يندەكسىنە سايكەس، قازاقستاندىق پاسپورت سوڭعى جىلدارى تۇراقتى تۇردە جوعارىلاپ كەلەدى.
ەگەر 2023 جىلى قازاقستان 70-ورىندا بولسا، 2024 جىلى - 66-ورىنعا، 2025 جىلى - 61-ورىنعا كوتەرىلگەن. ال 2026 جىلى 57-ساتىعا دەيىن جەتتى. وسىلايشا، 2،5 جىل ىشىندە ەل 13 پوزيسياعا ىلگەرىلەدى.
رەيتينگتە قازاقستان بوليۆيا مەن بەلارۋستەن جوعارى ورنالاسقانىمەن، كوسوۆو مەن قىتايدان كەيىن تۇر.
وڭىرلىك سالىستىرۋدا قازاقستان ورتاڭعى دەڭگەيدە قالىپ وتىر. قىرعىزستان مەن وزبەكستان 73-ورىندى ءبولىسىپ، ولاردىڭ ازاماتتارى 59 ەلگە ۆيزاسىز بارا الادى. تاجىكستان 79-ورىندا (53 ەل)، ال تۇرىكمەنستان 87-ورىندا (45 ەل).
رەسەي 44-ورىندا ورنالاسقان، ونىڭ ازاماتتارىنا 113 باعىت قولجەتىمدى. بەلارۋس - 58-ورىندا، ازەربايجان - 66-ورىندا (67 ەل).
رەيتينگ كوشباسىندا سينگاپۋر تۇر - بۇل ەلدىڭ پاسپورتىمەن 192 مەملەكەتكە ۆيزاسىز بارۋعا بولادى. سونداي-اق جاپونيا مەن وڭتۇستىك كورەيا ازاماتتارىنا 187 ەلگە ۆيزاسىز كىرۋ مۇمكىندىگى بەرىلگەن.
