اتاپ ايتقاندا، وقو اكىمدىگى وزبەكستاندىق «Alliance textile» كاسىپورنىمەن وڭتۇستىكتەگى توقىما ونەركاسىبىنە ينۆەستيسيا سالۋ بويىنشا، ال «وڭتۇستىك» ارنايى ەكونوميكالىق ايماعىنداعى توقىما كاسىپورىندارىن وڭالتۋ ءۇشىن «وڭتۇستىك» اەا-عى كورشى ەلدىڭ «كازتەحينپەكس» جشس-مەن، سونىمەن بىرگە مەديسينالىق ماقساتتاعى بۇيىمداردى وندىرۋگە ارنالعان زاۋىت قۇرىلىسىن سالۋ بويىنشا وبلىس اكىمدىگى مەن وزبەكستاندىق «دەنتافيل پليۋس» كومپانياسى اراسىندا مەموراندۋم ءتۇزىلدى.
سونىمەن بىرگە شىمكەنت قالاسىنداعى بارشا جاسىل تەحنولوگيا سالاسىنداعى ينۆەستيسيالىق جوبالاردى ىسكە اسىرۋ بويىنشا شىمكەنت قالاسى اكىمدىگى مەن «حالىقارالىق جاسىل تەحنولوگيالار جانە ينۆەستيسيالىق جوبالار ورتالىعى» كوممەرسيالىق ەمەس اكسيونەرلىك قوعامى اراسىندا سەرىكتەستىك تۋرالى كەلىسىمگە قول قويدى. بۇدان بولەك، ەكى ەلدىڭ 8 كاسىپكەرلەرى اراسىندا ەكسپورتقا ارنالعان ونىمدەردى جەتكىزۋ تۋرالى شارت جاسالدى.
ايتا كەتەيىك، بۇگىن وڭتۇستىك قازاقستان وبلىسىندا ىسكەرلىك قارىم-قاتىناستى دامىتۋ ماقساتىندا قازاقستان-وزبەكستان بيزنەس-فورۋمى وتكەن بولاتىن. فورۋم بارىسىندا العاش رەت ىسكەرلىك كەڭەستىڭ ءبىرىنشى كەزدەسۋى بولىپ ءوتتى. فورۋم جۇمىسىنا ەكى ەلدىڭ ەلشىلەرى ەرىك وتەمبايەۆ پەن سايديكرام نيازحودجايەۆ، ق ر ينۆەستيسيالار جانە دامۋ ۆيسە-مينيسترى قايىربەك وسكەنبايەۆ، وزبەكستان رەسپۋبليكاسىنىڭ سىرتقى ساۋدا ءمينيسترىنىڭ ورىنباسارى سوحيب سايفنازاروۆ، وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ، وزبەكستانداعى ساۋدا-ونەركاسىپ پالاتاسىنىڭ ءتوراعاسى ادحام يكراموۆ پەن 400-دەن استام قوس ەلدىڭ كاسىپكەرلەرى قاتىستى.
وقو كاسىپكەرلەر پالاتاسىنىڭ ۇيىمداستىرۋىمەن وتكەن فورۋم بارىسىندا تاراپتار بىرلەسكەن بيزنەس جوبالار مەن ينۆەستيسيالىق ۇسىنىستار جايىندا ىنتىماقتاستىقتى دامىتۋدى ءسوز ەتىپ، ەكسپورت پەن يمپورت بويىنشا ءۇشىنشى ەلدەرگە كىرۋ جايىن تالقىلادى.
وقو اكىمىنىڭ باسپا ءسوز قىزمەتى
