مەملەكەت باسشىسى 6 قاراشادا بىشكەكتە ءوتىپ جاتقان تۇركى مەملەكەتتەرى ۇيىمىنىڭ سامميتىندە تاراپتاردىڭ ورتالىق بانكتەر كەڭەسىن قۇرۋ تۋرالى باستامانى ءبىراۋىزدان قۇپتاعانىن جەتكىزدى، دەپ حابارلايدى Dalanews.kz.

الايدا ءسوز ەتىلىپ وتىرعان ورتالىق بانكتەر كەڭەسىنىڭ باس كەڭسەسى قايدا ورنالاسادى، ول قانداي فۋنكسيالاردى اتقارادى، بۇل تۋرالى تولىققاندى مالىمەتتەر جوقتىڭ قاسى.

سونداي-اق سامميتتەگى سوزىندە پرەزيدەنت تۇركى ينۆەستيسيالىق قورىنىڭ قىزمەتىن دە ءسوز ەتتى. قاسىم-جومارت توقايەۆتىڭ پىكىرىنشە، قارجى-ينۆەستيسيا سالاسىنداعى ىنتىماقتاستىقتى نىعايتۋ باعىتتىندا تۇركى ينۆەستيسيالىق قورى ەرەكشە ءرول اتقارىپ كەلەدى.  

"تۇركى ينۆەستيسيالىق قورى ءوز قىزمەتىن ءتيىمدى جالعاستىرىپ كەلەدى. مۇنى تۇركى ينتەگراسياسىن تەرەڭدەتۋگە باعىتتالعان قادام دەپ باعالايمىن. بۇگىنگى سامميتكە قىرعىز باۋىرلارىمىز "ەكونوميكالىق ينتەگراسيا، تۇراقتى دامۋ، سيفرلىق بولاشاق جانە قاۋىپسىزدىك" تاقىرىبىن ۇسىنىپ وتىر. بۇل ۇسىنىس ءبارىمىزدىڭ مۇددەمىزگە ساي كەلەدى. سوڭعى 10 جىلدا ۇيىم مۇشەلەرى اراسىنداعى ەكونوميكالىق بايلانىستار نىعايا ءتۇستى. بيىل ءوزارا ساۋدا اينالىمى 45 ميلليارد دوللاردان استى. وسى كورسەتكىشتى ءالى دە ۇلعايتۋعا بولادى. وعان مۇمكىندىگىمىز جەتەدى"، – دەدى قاسىم-جومارت توقايەۆ.

ايتا كەتسەك، تۇركى مەملەكەتتەرى ۇيىمى قۇرامىنا ءازىربايجان، قازاقستان، قىرعىز رەسپۋبليكاسى، تۇركيا، وزبەكستان ەنەدى. سونداي-اق ماجارستان مەن تۇرىكمەنستان باقىلاۋشى ەلدەر بولىپ تابىلادى.