Bloomberg باسىلىمىندا "2025 جىلى وپەك+ ىشكى شيەلەنىستەرگە تاپ بولادى، سونىڭ ىشىندە قازاقستانمەن دە" اتتى ماقالا جاريالاندى. بۇل ارادا تەڭىز كەنىشىندەگى ءوندىرىس كولەمىنىڭ ارتۋىنا باسا نازار اۋدارىلعان، دەپ حابارلايدى Dalanews.kz.
Bloomberg 2025 جىلى تەڭىز كەنىشى تولىققاندى قۋاتىمەن جۇمىس ىستەپ، تاۋلىگىنە 260 مىڭ باررەل مۇناي وندىرە باستايتىنىن باسا اتاپ كورسەتەدى. ال بۇل كولەم كەلەسى جىلعى الەمدىك مۇنايدىڭ بولجامدى سۇرانىسىنىڭ تورتتەن ءبىرىن (!) قامتيتىن كورىنەدى.
"وسىلايشا، اتالعان كەن ورنىنداعى ءوندىرىس كەلەسى جىلى قازاقستانداعى جەڭىل مۇناي ونىمدەرىن قوسا العاندا، تاۋلىگىنە 2 ملن باررەل، ياعني رەكوردتىق كورسەتكىشتە مۇناي وندىرەتىنىن بايقاتا الادى"، دەلىنگەن ماقالادا.
ماۋسىم ايىندا وپەك + كارتەلى 2024 جىلدىڭ سوڭعى ايلارىندا، سودان كەيىن 2025 جىلى كۆوتالاردى بىرتىندەپ ۇلعايتۋ جوسپارىن ماقۇلداعان بولاتىن. وعان قىركۇيەك ايىندا كىرىسۋى دە كەرەك ەدى، ءبىراق مۇناي باعاسىنىڭ تومەندەۋى بۇل جوسپار تىزگىنىن تارتا تۇرۋعا ماجبۇرلەپ، 2025 جىلدىڭ قاڭتارىنا اكەلىپ تىرەپ قويدى. كارتەل بۇل جوسپاردى تاعى شەگەرەدى مە، شەگەرمەيدى مە، مۇنىڭ جايىن تالقىلاۋ ءۇشىن جەكسەنبىدە كەزدەسۋى كەرەك بولاتىن.
Bloomberg ەگەر كارتەل كۆوتالاردى ۇلعايتۋ بويىنشا شەشىمدى تاعى كەيىنگە قالدىرسا، بۇل قازاقستان ءۇشىن ەلەۋلى سوققى بولادى دەپ پايىمدايدى.
"مۇندايدا قازاقستان وپەك + بەلگىلەگەن ءوندىرىس ليميتتەرىن ۇستانا المايدى نەمەسە جاسالعان ءىرى ينۆەستيسيالارعا قاراماستان بۇل قوسىمشا جوبا اياسىندا مۇنايدى ءوندىرۋدى كەيىنگە قالدىرۋعا ءماجبۇر بولادى. ەگەر تەك ەكونوميكالىق تيىمدىلىكتى باسشىلىققا الساق، قازاقستان باسقا جاقتاعى مۇناي ءوندىرىسىن قىسقارتىپ، تەڭىزدەگىسىن قولعا الادى، سەبەبى مۇنداعى مۇناي ءوندىرىسىنىڭ وزىندىك قۇنى ەڭ تومەنى، سوندىقتان ول ۇكىمەت پەن ونىڭ شەتەلدىك ارىپتەستەرى ءۇشىن وتە ءتيىمدى"، دەلىنگەن ماقالادا.
ەكونوميست عالىمجان ايتقازين كارتەل ىشىندەگى وسىنداي قاقتىعىستار بۇرىن دا ورىن العانىنا باسا نازار اۋدارتادى.
"مىسالى، 2021 جىلى ءباا كۆوتالارعا بايلانىستى ساۋد ارابياسىنىڭ كەلىسىمشارتتارىن بىرنەشە كۇنگە بۇعاتتاعان. سول كەزدە اقىرى ساۋديالىقتار جەڭىسكە جەتكەنىمەن، ولار ابۋ-دابيگە كەلەسى ايلاردا كۆوتا بويىنشا ايتارلىقتاي جەڭىلدىكتەر جاساۋعا مۇمكىندىك بەردى. ال كارتەل 2023 جىلى انگولا كۆوتاسىن قىسقارتپاق بولعاندا، بۇل ەل وپەك-تەن شىعا سالدى. قازاقستاننىڭ دا وسىلاي ەتۋ ءقاۋپى بار. "وپەك+ 2025 جىلى كوپتەگەن شەپتە قيىندىقتارعا تاپ بولادى"، دەپ Bloomberg جازىپ جاتىر. ال بۇگىن ۇكىمەت ساعاتىندا قازاقستاننىڭ ەنەرگەتيكا ءمينيسترى الماسادام ساتقالييەۆ اقىرى مۇناي ءوندىرىسىن ۇلعايتۋ تۋرالى امبيسيالىق جوسپارلارىمەن ءبولىستى..."، دەپ جازادى ول.
بۇعان دەيىن دە ءبىز قازاقستان تاراپى وپەك+ كۆوتالارىن بۇزۋمەن كەلە جاتقانى تۋرالى جازعان بولاتىنبىز.
