قازاقستان پرەزيدەنتى شاعىن قۇرامداعى كەزدەسۋدىڭ قورىتىندىسىنا جوعارى باعا بەرىپ، موڭعوليامەن مەملەكەتارالىق قارىم-قاتىناستى ودان ءارى دامىتۋدىڭ باسىم باعىتتارىن ايقىندادى. ال ۋحنااگيين حۋرەلسۋح قاسىم-جومارت توقايەۆتىڭ ەكى ەل اراسىنداعى تاۋار اينالىمىن 500 ميلليون دوللارعا دەيىن جەتكىزۋ تۋرالى ۇسىنىسىن قولدادى، دەپ حابارلايدى Dalanews.kz اقوردانىڭ باسپا ءسوز قىزمەتىنە سىلتەمە جاساپ.

– قازاق جانە موڭعول حالىقتارى – ۇلى دالا وركەنيەتىنىڭ مۇراگەرلەرى. ىنتىماقتاستىقتى جاڭا ستراتەگيالىق دەڭگەيگە كوتەرۋ ەكى ەلدىڭ مۇددەسىنە ساي كەلەدى. ءبىز موڭعول حالقىنا ۇلكەن قۇرمەتپەن قارايمىز جانە موڭعوليانىڭ جەتىستىگىنە ءاردايىم قۋانامىز. قازىرگى ۋاقىتتا ءسىزدىڭ باستاماڭىزبەن اۋقىمدى ساياسي-ەكونوميكالىق جانە الەۋمەتتىك رەفورمالار قولعا الىندى. "Vision-2050"، "ازىق-تۇلىكپەن قامتاماسىز ەتۋ جانە ونىڭ قاۋىپسىزدىگى"، "سالاۋاتتى موڭعول ۇلتى" سياقتى ماڭىزدى مەملەكەتتىك باعدارلامالار جۇزەگە اسىرىلىپ جاتىر، – دەدى مەملەكەت باسشىسى.

قاسىم-جومارت توقايەۆ ەكى ەلدىڭ اراسىندا تىعىز پارلامەنتارالىق جانە ۇكىمەتارالىق بايلانىستار قالىپتاسقانىن ەسكە سالىپ، ىنتىماقتاستىقتى نىعايتۋعا ايتارلىقتاي مۇمكىندىك بار ەكەنىنە نازار اۋداردى

– ساۋدا-ەكونوميكا، اۋىل شارۋاشىلىعى، كولىك-لوگيستيكا، تاۋ-كەن يندۋسترياسى، ونەركاسىپ، ينۆەستيسيا، جاڭا تەحنولوگيالار، عارىشتى يگەرۋ سالالارىندا ىقپالداستىقتى جانداندىرۋ قاجەت. بۇگىن قول قويىلاتىن قۇجاتتار ساياسي جانە ەكونوميكالىق الىس-بەرىستى دامىتۋعا تىڭ سەرپىن بەرەدى دەپ سەنەمىن، – دەدى پرەزيدەنت.

قاسىم-جومارت توقايەۆ قول جەتكىزىلگەن ۋاعدالاستىقتاردى ەكى ەل ۇكىمەتتەرى ۋاقتىلى جانە ساپالى جۇزەگە اسىرۋى قاجەت دەپ سانايدى.

بۇدان بولەك، مەملەكەت باسشىسى مادەني-گۋمانيتارلىق بايلانىستى نىعايتۋدىڭ ءمان-ماڭىزىنا توقتالىپ، استانادا وتكەن دۇنيەجۇزىلىك كوشپەندىلەر ويىندارىنا قاتىسقانى ءۇشىن موڭعول سپورتشىلارىنا العىس ايتتى.

قاسىم-جومارت توقايەۆ قازاقستان موڭعول ستۋدەنتتەرى ءۇشىن كۆوتا سانىن ۇلعايتۋعا دايىن ەكەنىن مالىمدەدى. سونداي-اق ەكى ەل عالىمدارىن ورتاق باي تاريحي مۇرامىزدى بىرلەسە زەرتتەۋگە شاقىردى.

بۇدان بولەك، پرەزيدەنت ەكولوگيالىق، تاريحي، ەتنوگرافيالىق جانە ەكونوميكالىق تۋريزم باعىتتارىندا بىرلەسە جۇمىس ىستەۋگە مول مۇمكىندىك بار ەكەنىن اتاپ ءوتتى.

– قازاقستاندىق تۋروپەراتورلار موڭعول تۋريستەرىنە قوجا احمەت ياساۋي كەسەنەسى ورنالاسقان ەجەلگى تۇركىستان قالاسىن تانىستىرا الادى. شىڭعىس حاننىڭ ۇلكەن ۇلى جوشى حاننىڭ مازارى تۇرعان ۇلىتاۋ وبلىسىن جانە باسقا دا تۋريستىك ورىنداردى كورسەتۋگە بولادى. سونداي-اق ءبىز موڭعوليامەن التاي تۋريزم كلاستەرىن دامىتۋعا جانە ورتاق تۋريستىك باعىتتاردى قالىپتاستىرۋعا مۇددەلىمىز، – دەدى مەملەكەت باسشىسى.

قاسىم-جومارت توقايەۆ موڭعوليا پرەزيدەنتىن كەلەسى جىلى قازاقستانعا مەملەكەتتىك ساپارمەن كەلۋگە شاقىردى.

ءوز كەزەگىندە ۋحنااگيين حۋرەلسۋح موڭعوليانىڭ قازاقستانمەن ەكىجاقتى بايلانىستاردىڭ بارلىق باعىتىن نىعايتۋعا بەيىل ەكەنىن راستادى. ول بۇگىن قول جەتكىزىلگەن ۋاعدالاستىقتار ەكى ەل اراسىنداعى قارىم-قاتىناستىڭ جاڭا پاراعىن اشاتىنىنا سەنىم ءبىلدىردى.

ۋحنااگيين حۋرەلسۋح قازاقستاندى موڭعوليانىڭ ماڭىزدى سەرىكتەسى، سونداي-اق شىعىس پەن باتىستىڭ اراسىنداعى التىن كوپىر ەكەنىن اتاپ ءوتتى. ونىڭ سوزىنشە، ۇلان-باتىر قازاقستاننىڭ ەكونوميكالىق دامۋ تاجىريبەسىنە دەن قويىپ وتىر. سونىمەن قاتار ساۋدا، كولىك-لوگيستيكا، اۋىل شارۋاشىلىعى، عارىشتى زەرتتەۋ سالالارىنداعى ەكىجاقتى جوبالاردى ءتيىمدى جۇزەگە اسىرۋعا ايرىقشا ءمان بەرەدى. اتاپ ايتقاندا، ۋحنااگيين حۋرەلسۋح قاسىم-جومارت توقايەۆتىڭ ەكى ەل اراسىنداعى تاۋار اينالىمىن 500 ميلليون دوللارعا دەيىن جەتكىزۋ تۋرالى ۇسىنىسىن قولدادى.

كەلىسسوزدەر اياقتالعاننان كەيىن مەملەكەتتەر باسشىلارى ستراتەگيالىق سەرىكتەستىك ورناتۋ تۋرالى بىرلەسكەن دەكلاراسياعا قول قويدى. سودان كەيىن قول قويىلعان قۇجاتتاردى الماسۋ ءراسىمى ءوتتى.

قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ موڭعولياعا مەملەكەتتىك ساپارى اياسىندا ەكى ەل دەلەگاسيالارى تومەندەگىدەي قۇجاتتارعا قول قويدى:

1. قازاقستان رەسپۋبليكاسىنىڭ ۇكىمەتى مەن موڭعوليا ۇكىمەتى اراسىنداعى زەينەتاقى سالاسىنداعى ىنتىماقتاستىق تۋرالى كەلىسىم؛

2. قازاقستان رەسپۋبليكاسى مەن موڭعوليا اراسىنداعى 2025-2027 جىلدارعا ارنالعان ساۋدا-ەكونوميكالىق ىنتىماقتاستىقتى جانداندىرۋ جونىندەگى جول كارتاسى؛

3. قازاقستان رەسپۋبليكاسىنىڭ ۇكىمەتى مەن موڭعوليا ۇكىمەتى اراسىنداعى اۆياسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىم؛

4. قازاقستان رەسپۋبليكاسىنىڭ كولىك مينيسترلىگى مەن موڭعوليانىڭ جول جانە كولىك سالاسىن دامىتۋ مينيسترلىگى اراسىنداعى اۆتوموبيل جولدارىن دامىتۋ تۋرالى مەموراندۋم؛

5. قازاقستان رەسپۋبليكاسىنىڭ سىرتقى ىستەر مينيسترلىگى مەن موڭعوليانىڭ سىرتقى ىستەر مينيسترلىگى اراسىنداعى 2025-2027 جىلدارعا ارنالعان ىنتىماقتاستىق تۋرالى جوسپار؛

6. قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن موڭعوليانىڭ مادەنيەت، سپورت، تۋريزم جانە جاستار ءىسى جونىندەگى مينيسترلىگى اراسىنداعى مادەنيەت سالاسىنداعى ىنتىماقتاستىق تۋرالى مەموراندۋم؛

7. قازاقستان رەسپۋبليكاسىنىڭ تۋريزم جانە سپورت مينيسترلىگى مەن موڭعوليانىڭ مادەنيەت، سپورت، تۋريزم جانە جاستار ءىسى جونىندەگى مينيسترلىگى اراسىنداعى تۋريزم سالاسىنداعى ىنتىماقتاستىق تۋرالى مەموراندۋم؛

8. قازاقستان رەسپۋبليكاسىنىڭ اۋىل شارۋاشىلىعى مينيسترلىگى مەن موڭعوليانىڭ ازىق-تۇلىك، اۋىل شارۋاشىلىعى جانە جەڭىل ونەركاسىپ مينيسترلىگى اراسىنداعى ىنتىماقتاستىق تۋرالى مەموراندۋم؛

9. قازاقستان رەسپۋبليكاسىنىڭ اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتى مەن موڭعوليانىڭ باس ۆەتەريناريالىق باسقارماسى اراسىنداعى ۆەتەريناريا قىزمەتى جانە كارانتين سالاسىنداعى ءوزارا تۇسىنىستىك تۋرالى مەموراندۋم؛

10. قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى مەن موڭعوليانىڭ سيفرلىق دامۋ، يننوۆاسيالار جانە كوممۋنيكاسيالار مينيسترلىگى اراسىنداعى ىنتىماقتاستىق تۋرالى مەموراندۋم؛

11. قازاقستان رەسپۋبليكاسىنىڭ ەنەرگەتيكا مينيسترلىگى مەن موڭعوليانىڭ اتوم ەنەرگياسى جونىندەگى كوميسسيانىڭ اتقارۋشى كەڭسەسى اراسىنداعى اتوم ەنەرگەتيكاسى سالاسىنداعى ىنتىماقتاستىق تۋرالى مەموراندۋم.