2024 جىلدىڭ قاراشاسىنداعى مالىمەتكە سايكەس، ۇلتتىق قوردا $60،7 ملرد بار ەكەنى بەلگىلى بولدى، دەپ حابارلايدى Dalanews.kz.
Buzyq telegram-ارناسى قازاقستاننىڭ قارجى احۋالىن زەرتتەپ، ەلدە قانشا اقشا بار ەكەنىن جانە الەمگە قانشا قارىز ەكەنىن انىقتادى. زەرتتەۋگە ۇلتتىق بانكتىڭ ماماندارى مۇرات ەركىنالييەۆ پەن زابيرا كامالدينوۆا اتسالىسقان.
دەرەككوز مالىمەتىنشە، ۇلتتىق قورداعى ەڭ جوعارى سوما 2014 جىلى تىركەلگەن. ول كەزدە $77،2 ملرد جيناقتالعان ەكەن.
“2024 جىلدىڭ قاراشاسىنداعى جاعداي بويىنشا ۇلتتىق قوردا $60،7 ملرد ساقتالعان. بۇل – كەيىنگى ۇرپاققا قالاتىن مۇرا. سوڭعى 10 جىلدا ۇلتتىق قورداعى قارجى $16،5 ملرد-قا ازايعان. بيىل ۇلتتىق قوردان بيۋدجەت قاجەتتىلىكتەرىنە ₸5،6 ترلن ($11،2 ملرد) بولىنگەنىمەن، قايتارىلعان قارجى ايتارلىقتاي از. بۇل ماسەلە دەپۋتاتتار تالقىلاۋىنا تۇسكەن. دەگەنمەن قازاقستانعا قارىز ەلدەر دە بار”، — دەيدى دەرەككوز.
مەملەكەتتىك قارىزدىڭ قازىرگى جاعدايى
قازاقستاننىڭ سىرتقى مەملەكەتتىك قارىزى $12،9 ملرد-قا جەتكەن.
“مەملەكەتتىك قارىز سىرتقى جانە ىشكى بولىپ ەكىگە بولىنەدى. ىشكى قارىز – مەملەكەتتىڭ قازاقستاندىقتارعا بەرەشەگى. ال سىرتقى قارىز – شەتەلدىك نەسيە بەرۋشىلەر الدىنداعى مىندەتتەمەلەرى. قازىرگى سىرتقى مەملەكەتتىك قارىز كولەمى – $12،9 ملرد. قازاقستان قارىزدىڭ باسىم بولىگىن ۇلىبريتانيا، ليۋكسەمبۋرگ، رەسەي جانە حالىقارالىق ۇيىمداردان العان. الايدا باسقا مەملەكەتتەر دە بىزگە قارىز. ءارى ولاردىڭ قارىزى ءبىزدىڭ قارىزىمىزدان الدەقايدا كوپ”، — دەيدى ولار.
ايتۋلارىنشا، قازاقستاننىڭ سىرتقى اكتيۆتەرى كەم دەگەندە $98،5 ملرد-قا تەڭ. بۇل ەلدىڭ حالىقارالىق قارجىلىق مىندەتتەمەلەرىن وتەي الاتىنىن كورسەتەدى.
“ال ەندى جالپى سىرتقى قارىزعا كەلسەك، ونىڭ كولەمى – $166،6 ملرد. ءبىراق مۇندا مەملەكەتتىك قارىزدان بولەك، بانكتەردىڭ، جەكە كومپانيالاردىڭ جانە باسقا ۇيىمداردىڭ قارىزدارى كىرەدى”، — دەدى ولار.
