2023 جىلى تىكەلەي شەتەلدىك ينۆەستيسيانىڭ جالپى اعىنى 23،4 ملرد اقش دوللارىن قۇراسا، بۇل 2022 جىلعى دەڭگەيدەن 16،9%-عا از، دەپ حابارلايدى Dalanews.kz.
بۇل تۋرالى قازاقستاننىڭ 2029 جىلعا دەيىنگى ينۆەستيسيالىق تۇجىرىمداماسىنىڭ جوباسىندا جازىلعان. قۇجات اشىق نقا پورتالىندا جاريالاندى.
"2023 جىلى تىكەلەي شەتەلدىك ينۆەستيسيا اعىنىنىڭ تومەندەۋىنىڭ باسىم ۇلەسى تاۋ-كەن ونەركاسىبىنە تيەسىلى. بۇل، نەگىزىنەن، مۇناي باعاسىنىڭ تومەندەۋىنە بايلانىستى قازاقستاندىق كاسىپورىنداردىڭ تازا تابىسىنىڭ قىسقارۋىمەن، سونداي-اق شەتەلدىك ينۆەستورلاردىڭ ۇلەسىنە تيەسىلى ديۆيدەندتەردى تولەۋمەن تۇسىندىرىلەدى. تاۋ-كەن ونەركاسىبىنە تىكەلەي شەتەلدىك ينۆەستيسيا جالپى اعىنى ءبىر جىل ىشىندە 30،3%-عا 8،4 ملرد اقش دوللارىنا دەيىن تومەندەدى، بۇل رەتتە تىكەلەي شەتەلدىك ينۆەستيسيا تازا اعىنى 2022 جىلعى 4،0 ملرد اقش دوللارىنان 31،2 ملن اقش دوللارىنا دەيىن قىسقاردى"، – دەلىنگەن قۇجات جوباسىندا.
مەتاللۋرگيا ونەركاسىبىنە سالىنعان كاپيتال سالىمدارىنىڭ كولەمى دە تومەندەپ كەلەدى. تىكەلەي شەتەلدىك ينۆەستيسيانىڭ جالپى اعىنى 4،2-دەن 2،8 ملرد دوللارعا دەيىن تومەندەدى. 2022 جانە 2023 جىلدارى سالاعا تىكەلەي شەتەلدىك ينۆەستيسيانىڭ تازا اعىنى تەرىس بولىپ، تيىسىنشە - 534 جانە - 30 ملن اقش دوللارىن قۇرادى.
ءبىراق بۇعان قاراماستان، قازاقستان شەتەلدەن ينۆەستيسيا تارتۋ كولەمىن ۇلعايتۋدى جوسپارلاپ وتىر. ۇلتتىق دامۋ جوسپارىنا سايكەس، 2029 جىلعا دەيىن 150 ملرد اقش دوللارى شەتەلدىك ينۆەستيسيالاردى تارتۋ كوزدەلگەن.
