2023 жылы тікелей шетелдік инвестицияның жалпы ағыны 23,4 млрд АҚШ долларын құраса, бұл 2022 жылғы деңгейден 16,9%-ға аз, деп хабарлайды Dalanews.kz.
Бұл туралы Қазақстанның 2029 жылға дейінгі инвестициялық тұжырымдамасының жобасында жазылған. Құжат Ашық НҚА порталында жарияланды.
"2023 жылы тікелей шетелдік инвестиция ағынының төмендеуінің басым үлесі тау-кен өнеркәсібіне тиесілі. Бұл, негізінен, мұнай бағасының төмендеуіне байланысты қазақстандық кәсіпорындардың таза табысының қысқаруымен, сондай-ақ шетелдік инвесторлардың үлесіне тиесілі дивидендтерді төлеумен түсіндіріледі. Тау-кен өнеркәсібіне тікелей шетелдік инвестиция жалпы ағыны бір жыл ішінде 30,3%-ға 8,4 млрд АҚШ долларына дейін төмендеді, бұл ретте тікелей шетелдік инвестиция таза ағыны 2022 жылғы 4,0 млрд АҚШ долларынан 31,2 млн АҚШ долларына дейін қысқарды", – делінген құжат жобасында.
Металлургия өнеркәсібіне салынған капитал салымдарының көлемі де төмендеп келеді. Тікелей шетелдік инвестицияның жалпы ағыны 4,2-ден 2,8 млрд долларға дейін төмендеді. 2022 және 2023 жылдары салаға тікелей шетелдік инвестицияның таза ағыны теріс болып, тиісінше - 534 және - 30 млн АҚШ долларын құрады.
Бірақ бұған қарамастан, Қазақстан шетелден инвестиция тарту көлемін ұлғайтуды жоспарлап отыр. Ұлттық даму жоспарына сәйкес, 2029 жылға дейін 150 млрд АҚШ доллары шетелдік инвестицияларды тарту көзделген.
