قازاقستاننىڭ تولەم جۇيەلەرى، ەكىنشى دەڭگەيلى بانكتەر مەن تولەم جۇيەسىنىڭ وزگە دە قاتىسۋشىلارى تولەم حابارلامالارىنىڭ حالىقارالىق ISO 20022 ستاندارتىنا ءساتتى كوشىرىلدى. بۇل تۋرالى بۇگىن، 2025 جىلى 16 قاڭتاردا ۇلتتىق بانك مالىمدەدى، دەپ جازادى Dalanews.kz.
"ۇلتتىق بانك قازاقستاننىڭ تولەم جۇيەلەرى، ەكىنشى دەڭگەيلى بانكتەر مەن تولەم جۇيەسىنىڭ وزگە دە قاتىسۋشىلارى تولەم حابارلامالارىنىڭ حالىقارالىق ISO 20022 ستاندارتىنا ءساتتى كوشىرىلگەنىن حابارلايدى"، دەلىنگەن رەتتەۋشى ورگان حابارلاماسىندا.
جاڭا ستاندارتتى ەسكەرە وتىرىپ جاڭعىرتىلعان تولەم جۇيەلەرى مەن بانكتەردىڭ اقپاراتتىق جۇيەلەرى 2025 جىلعى 13 قاڭتاردان باستاپ جاڭا فورماتتا ىسكە قوسىلدى.
"بانكتەر كليەنتتەردىڭ تولەم تاپسىرمالارىن اقپاراتتىق جۇيەلەردىڭ جۇمىس كەستەسىنە سايكەس ادەتتەگى رەجيمدە، ەش شەكتەۋسىز جانە كىدىرىسسىز قابىلداپ جاتىر"، - دەيدى ۇلتتىق بانك.
قازاقستان ورتالىق ازيا ەلدەرى اراسىندا العاشقىلاردىڭ ءبىرى بولىپ حالىقارالىق ستاندارتتى پايدالاناتىن مەملەكەتتەردىڭ قاتارىنا كىردى. ەندى ەۋروپالىق وداق پەن وڭتۇستىك-شىعىس ازيا ەلدەرىمەن بىرگە ترانسشەكارالىق تولەمدەردى جەڭىلدەتىپ، حالىقارالىق ساۋدا-ساتتىقتىڭ دامۋىنا ىقپال ەتەدى.
ISO 20022 ستاندارتىنىڭ ەنگىزىلۋى قارجى ينستيتۋتتارى مەن كليەنت (تۇتىنۋشى) اراسىنداعى ءوزارا ارەكەتتەسۋدىڭ تيىمدىلىگىن ارتتىرىپ قانا قويماي، قارجى نارىعىنداعى تەحنولوگيالىق وزگەرىستەرگە ءبىرىڭعاي ەرەجەلەر مەن راسىمدەر نەگىزىندە تەز بەيىمدەلۋگە مۇمكىندىك بەرەدى.
