«ەشكىم بۇلاي بولادى دەپ ويلاعان جوق. مەن بۇل ۋاقىتتا كەشكى اسىمدى ءىشىپ وتىر ەدىم. ەڭ ءبىرىنشى اقپارات تۆيتتەر الەۋمەتتىك جەلىسىندە پايدا بولدى. وسى الەۋمەتتىك جەلىنى پايدالانۋشىلار تۇنگى ساعات 22.00 شاماسىندا انكارانىڭ ۇستىنەن اسكەري ۇشاقتار ۇشىپ جاتقاندىعىن، ىستامبۇل قالاسىندا ەكى كوپىردىڭ جابىلعاندىعىن جازدى.
كەيىن، اسكەريلەردىڭ تۇركيا پرەزيدەنتىنىڭ رەزيدەنسياسىن باسىپ العاندىعى جايىندا اقپارات پايدا بولدى.
بۇلىكشىلەر توبى مۇنى اسكەري توڭكەرىس دەپ مالىمدەدى. بۇدان كەيىن، 15-20 مينۋتتان كەيىن العاشقى مالىمەتتەر پايدا بولا باستادى. ادامدار الەۋمەتتىك جەلى مەن تەلەارنالىق حابارلاردى مۇقيات باقىلاپ وتىردى»، - دەدى ە. ءجۇسىپ.
ودان ءارى تۇركيانىڭ رەيتينگتىك NTV تەلەارناسىنىڭ تىكەلەي ەفيرىنە تەلەفون ارقىلى تۇركيانىڭ پرەمەر-مينيسترى بينالي يىلدىرىم شىقتى.
ول بولىپ جاتقان وقيعاعا اسكەري توڭكەرىس دەپ باعا بەرۋگە بولمايتىندىعىن ايتتى. پرەمەر حالىقتى تىنىشتىققا شاقىرىپ، ءقازىر جاعدايدىڭ تۇراقتالعاندىعىن، بارلىعى باقىلاۋعا الىنعاندىعىن، كىنالىلەر جازاعا تارتىلاتىندىعىن مالىمدەدى.
«ءبىراق، كەيىن جاعداي شىنىندا دا ءقاۋىپتى بولا باستادى. كوپ ۇزاماي پرەزيدەنتتىڭ ءوزى Skype ارقىلى تىكەلەي ەفيرگە شىعىپ، شىن مانىسىندە ەل قارۋلى كۇشتەرىنىڭ بەلگىلى ءبىر اسكەرلەرى بيلىكتى باسىپ الۋعا ارەكەت جاساعاندىقتارىن، وسىلايشا وپاسىزدىققا بارعاندارىن مالىمدەدى.
ول حالىقتى ورتالىق الاڭدارعا، اۋەجايلارعا شىعىپ، بۇلىكشىلەردىڭ ارەكەتىنە نارازىلىق بىلدىرۋگە شاقىردى. وسى ۋاقىتتا اتاتۇرىك اۋەجايى سەكىلدى ستراتەگيالىق ماڭىزى بار نىساندارعا تانكتەر جىلجي باستادى.
ۇلتتىق بارلاۋ عيماراتىنىڭ الدىندا قارۋلى قاقتىعىس بولدى. توڭكەرىسشىلەر ونى باسىپ العىسى كەلدى.
ولار ىستامبۇلداعى ىشكى ىستەر باسقارماسىن دا باسىپ العىسى كەلىپ، ول جاققا تانكتەردى باعىتتادى. حالىق پرەزيدەنتتىڭ مالىمدەمەسىنەن كەيىن، كوشەلەرگە، الاڭدارعا شىعىپ، تانكتەردىڭ وتۋىنە جول بەرمەدى»، - دەدى وتانداسىمىز.
ال بۇلىكشىلەردىڭ مالىمدەۋىنشە، ولار جەمقور بيلىكتى تاقتان تايدىرۋعا تىرىسقان.
«ەڭ قىزىعى، تۇركيانىڭ قارۋلى كۇشتەرىنىڭ رەسمي سايتىندا بيلىكتىڭ باسىپ الىنعاندىعى تۋرالى اقپارات پايدا بولدى. ودان كەيىن، ينتەرنەت پەن الەۋمەتتىك جەلىلەر ناشار جۇمىس ىستەي باستادى.
ال كوپ ۇزاماي تۇرعىندار ازىق-تۇلىك ساتىپ الۋ ءۇشىن جاپپاي دۇكەندەرگە اعىلا باستادى. ويتكەنى، ەرتەڭگى كۇننىڭ قالاي بولاتىنى بەلگىسىز ەدى.
بۇل ۋاقىتتا بانكوماتتار، جانار ماي قۇيۋ ستانسالارى جانە قوعامدىق كولىك جۇمىس ىستەمەدى. بۇقارالىق اقپارات قۇرالدارىنىڭ مالىمدەۋىنشە، ىستامبۇلدىڭ كەيبىر اۋماقتارىندا جارىلىس دىبىستارى ەستىلىپتى.
كەيىن، بۇلىكشىلەر تۇركيا قارۋلى كۇشتەرىنىڭ باسشىسى، ولاردىڭ قولىنا كەپىلدىككە الىنعاندىعىن مالىمدەدى.
تاڭعا قاراي ونىڭ جاعدايى قالاي بولعانى بەلگىسىز. پرەمەر-مينيستر ەگەر دە كىمدە-كىم اۋەگە اسكەري ۇشاقتاردى نەمەسە تىكۇشاقتاردى رۇقساتسىز كوتەرەتىن بولسا، اتىپ تۇسىرىلەتىندىگىن حابارلادى»، - دەدى ەرجان.
سونداي-اق، ول تۇركيا پارلامەنتىنە دە شابۋىل جاسالىپ، 12 ادامنىڭ جاراقات العاندىعىن جەتكىزدى. ءوز كەزەگىندە قازاقستاننىڭ كونسۋلدىعى تۇركيادا جۇرگەن قازاقستاندىق ستۋدەنتتەردى جانە باسقا دا وتانداستارىمىزدى اباي بولۋعا، ازىرگە ۇيدەن دالعا شىقپاۋعا شاقىردى.
«تاعى ءبىر ايتا كەتەتىن جايت، رەجەپ تاييپ ەردوعان مەملەكەتتىك توڭكەرىس جاسالۋ بارىسىندا مارماريستەگى قوناق ۇيدەن شىققانى سول ەكەن، سول قوناق ۇيگە شابۋىل جاسالعان. وعان ەكى بومبا ءتۇستى»، - دەدى ە. ءجۇسىپ.
