Qazaqstan azamattary Túrkiiadaǵy áskeri tóńkeris týraly áńgimeledi
«Eshkim bulai bolady dep oilaǵan joq. Men bul ýaqytta keshki asymdy iship otyr edim. Eń birinshi aqparat Tvitter áleýmettik jelisinde paida boldy. Osy áleýmettik jelini paidalanýshylar túngi saǵat 22.00 shamasynda Ankaranyń ústinen áskeri ushaqtar ushyp jatqandyǵyn, Ystambul qalasynda eki kópirdiń jabylǵandyǵyn jazdy.
Keiin, áskerilerdiń Túrkiia Prezidentiniń rezidentsiiasyn basyp alǵandyǵy jaiynda aqparat paida boldy.
Búlikshiler toby muny áskeri tóńkeris dep málimdedi. Budan keiin, 15-20 minýttan keiin alǵashqy málimetter paida bola bastady. Adamdar áleýmettik jeli men telearnalyq habarlardy muqiiat baqylap otyrdy», - dedi E. Júsip.
Odan ári Túrkiianyń reitingtik NTV telearnasynyń tikelei efirine telefon arqyly Túrkiianyń Premer-ministri Binali Iyldyrym shyqty.
Ol bolyp jatqan oqiǵaǵa áskeri tóńkeris dep baǵa berýge bolmaityndyǵyn aitty. Premer halyqty tynyshtyqqa shaqyryp, qazir jaǵdaidyń turaqtalǵandyǵyn, barlyǵy baqylaýǵa alynǵandyǵyn, kináliler jazaǵa tartylatyndyǵyn málimdedi.
«Biraq, keiin jaǵdai shynynda da qaýipti bola bastady. Kóp uzamai Prezidenttiń ózi Skype arqyly tikelei efirge shyǵyp, shyn mánisinde el qarýly kúshteriniń belgili bir áskerleri bilikti basyp alýǵa áreket jasaǵandyqtaryn, osylaisha opasyzdyqqa barǵandaryn málimdedi.
Ol halyqty ortalyq alańdarǵa, áýejailarǵa shyǵyp, búlikshilerdiń áreketine narazylyq bildirýge shaqyrdy. Osy ýaqytta Atatúrik áýejaiy sekildi strategiialyq mańyzy bar nysandarǵa tankter jylji bastady.
Ulttyq barlaý ǵimaratynyń aldynda qarýly qaqtyǵys boldy. Tóńkerisshiler ony basyp alǵysy keldi.
Olar Ystambuldaǵy Ishki ister basqarmasyn da basyp alǵysy kelip, ol jaqqa tankterdi baǵyttady. Halyq Prezidenttiń málimdemesinen keiin, kóshelerge, alańdarǵa shyǵyp, tankterdiń ótýine jol bermedi», - dedi otandasymyz.
Al búlikshilerdiń málimdeýinshe, olar jemqor bilikti taqtan taidyrýǵa tyrysqan.
«Eń qyzyǵy, Túrkiianyń Qarýly Kúshteriniń resmi saitynda biliktiń basyp alynǵandyǵy týraly aqparat paida boldy. Odan keiin, internet pen áleýmettik jeliler nashar jumys istei bastady.
Al kóp uzamai turǵyndar azyq-túlik satyp alý úshin jappai dúkenderge aǵyla bastady. Óitkeni, erteńgi kúnniń qalai bolatyny belgisiz edi.
Bul ýaqytta bankomattar, janar mai quiý stansalary jáne qoǵamdyq kólik jumys istemedi. Buqaralyq aqparat quraldarynyń málimdeýinshe, Ystambuldyń keibir aýmaqtarynda jarylys dybystary estilipti.
Keiin, búlikshiler Túrkiia Qarýly Kúshteriniń basshysy, olardyń qolyna kepildikke alynǵandyǵyn málimdedi.
Tańǵa qarai onyń jaǵdaiy qalai bolǵany belgisiz. Premer-ministr eger de kimde-kim áýege áskeri ushaqtardy nemese tikushaqtardy ruqsatsyz kóteretin bolsa, atyp túsiriletindigin habarlady», - dedi Erjan.
Sondai-aq, ol Túrkiia Parlamentine de shabýyl jasalyp, 12 adamnyń jaraqat alǵandyǵyn jetkizdi. Óz kezeginde Qazaqstannyń konsýldyǵy Túrkiiada júrgen qazaqstandyq stýdentterdi jáne basqa da otandastarymyzdy abai bolýǵa, ázirge úiden dalǵa shyqpaýǵa shaqyrdy.
«Taǵy bir aita ketetin jait, Rejep Taiip Erdoǵan memlekettik tóńkeris jasalý barysynda Marmaristegi qonaq úiden shyqqany sol eken, sol qonaq úige shabýyl jasalǵan. Oǵan eki bomba tústi», - dedi E. Júsip.
