قازاقستاندا الداعى ءۇش جىلدا ەلدەگى استىقتى تەرەڭ وڭدەۋ قۋاتى جىلىنا 500 مىڭ توننادان 2،5 ميلليون تونناعا دەيىن ۇلعايادى. مۇنداي سەرپىلىس ىشكى نارىقتى قامتاماسىز ەتىپ قانا قويماي، الەمدىك اگرارلىق ارەناداعى ورىندى كۇشەيتۋگە مۇمكىندىك بەرەدى، دەپ حابارلايدى Dalanews.kz.
بۇگىندە قازاقستاندا كراحمال، سىرنە، سيروپ، گليۋتەن، بيوەتانول جانە مال ازىعىن وندىرەتىن ءۇش ءىرى كاسىپورىن جۇمىس ىستەيدى: جاركەنت كراحمال-سىرنە زاۋىتى (جىلىنا 150 مىڭ توننا جۇگەرى)، «ازيااگروفۋد» (60 مىڭ توننا جۇگەرى) جانە «بيووپەرەيشن» (300 مىڭ توننا بيداي).
2028 جىلعا دەيىن سالادا ءتورت ءىرى جوبانى ىسكە قوسۋ جوسپارلانىپ وتىر. ولاردىڭ قاتارىندا:
- تۇركىستان وبلىسىنداعى جۇگەرىنى وڭدەيتىن «كازكراحمال» ج ش س زاۋىتى (ينۆەستيسيا كولەمى – 57 ملن دوللار، قۋاتى – 100 مىڭ توننا، ىسكە قوسىلۋى – 2026 جىل).
- Tiryaki Agro (تۇركيا) جانە Hassad Food (كاتار) جوباسى – جىلىنا 250 مىڭ توننا استىق پەن 80 مىڭ توننا بۇرشاق وڭدەۋ، كراحمال، گليۋتەن جانە گليۋكوزا-فرۋكتوزا سيروپىن ەكسپورتتاۋ.
- Fufeng Group Company Limited (جۇڭگو) – جامبىل وبلىسىنداعى قۋاتى 1 ملن توننا بولاتىن زاۋىت، قۇنى 350 ملن دوللار.
- «Qostanai Grain Industry» ج ش س – قوستاناي وبلىسىنداعى قايتا وڭدەۋ كەشەنى (قۋاتى – 415 مىڭ توننا، قۇنى – 108،7 ملن دوللار، ىسكە قوسىلۋى – 2027 جىل، ونىمدەرى – ليزين، گليۋتەن، بيوەتانول، كومىرقىشقىل گازى).
وڭدەۋشىلەردى قولداۋ ءۇشىن 2025 جىلى «اگروبيزنەس» باعدارلاماسى اياسىندا 44،3 ملرد تەڭگە 5% مولشەرلەمەمەن ءبولىندى. ءقازىردىڭ وزىندە 14،5 ملرد تەڭگەگە 30 جوبا قارجىلاندىرىلدى، تاعى 12،3 ملرد تەڭگەگە 34 جوبا ماقۇلداندى، ال 17 جوبا قارالۋ ۇستىندە.
قازاقستان ءوز ءونىمىن شەتەلگە بەلسەندى تۇردە ىلگەرىلەتىپ جاتىر. ساۋدا مينيسترلىگىمەن بىرلەسىپ ەكسپورتتاۋشىلاردى قولداۋدىڭ ەكوجۇيەسى جاسالدى. ول 20-دان استام قارجىلىق جانە قارجىلىق ەمەس قۇرالداردى قامتيدى، سونىڭ ىشىندە شوب ءۇشىن ەكسپورتتىق اكسەلەراسيا باعدارلاماسى مەن تاسىمالداۋ شىعىندارىن سۋبسيديالاۋ بار.
ساراپشىلاردىڭ پىكىرىنشە، وڭدەۋ قۋاتتارىنىڭ ۇلعايۋى قازاقستانعا استىقتى شيكىزات كۇيىندە ساتپاي، الەمنىڭ ازىق-تۇلىك، فارماسيەۆتيكا جانە مال ازىعى ونەركاسىبىندە سۇرانىسقا يە دايىن قوسپالار مەن ينگرەديەنتتەردى ەكسپورتتاۋعا جول اشادى.
