10 قاڭتار كۇنى قازاقستاننىڭ اۋە كەڭىستىگىندە ەكى جولاۋشى ۇشاعى قاۋىپسىزدىك تالاپتارىندا بەلگىلەنگەن اراقاشىقتى ساقتاماي، بىر-بىرىمەن سوقتىعىسا جازدادى. بۇل تۋرالى ق ر كولىك مينيسترلىگىنىڭ كولىكتەگى وقيعالار مەن ينسيدەنتتەردى تەرگەۋ دەپارتامەنتى مالىمدەدى، دەپ حابارلايدى Dalanews.kz.
وقيعا ساعات 05:42 شاماسىندا شىمكەنت ايماقتىق ديسپەچەرلىك ورتالىعىنىڭ جاۋاپكەرشىلىك ايماعىندا بولعان. سول ساتتە ءبىر اۋە سەكتورىندا ءبىر مەزەتتە ەكى اۋە كەمەسى بولعان. ولار Boeing 737-800 - پوبەدا اۋە كومپانياسىنىڭ PBD997 رەيسى (ۆنۋكوۆو – سامارقاند باعىتى) جانە Airbus A320 - Uzbekistan Airways اۋە كومپانياسىنىڭ UZB9609 رەيسى (تەرمەز – ماسكەۋ باعىتى).
رەسمي مالىمەتكە سايكەس، جاعداي تەرگەۋگە جاتاتىن اۋىر اۆياسيالىق وقيعا رەتىندە باعالانعان.
اتالعان دەرەك بويىنشا ارنايى كوميسسيا قۇرىلادى. ول ينسيدەنتتىڭ سەبەپتەرىن، سونىڭ ىشىندە اۋە قوزعالىسىن باسقارۋ بارىسىندا جىبەرىلۋى مۇمكىن قاتەلىكتەردى نەمەسە ەكيپاج ارەكەتتەرىن انىقتاۋى ءتيىس.
