«قازاقستان ارۋى» ۇيىمداستىرۋ كوميتەتى "عالام ارۋى قازاقستان-2022" اتاعىنىڭ بۇرىنعى يەگەرى ديانا تاشىمبەتوۆامەن بولعان جانجالدىڭ ءمان-جايىن ايتىپ، ماسەلەگە نۇكتە قويدى. وندا كوميتەت ديانا تاشىمبەتوۆانىڭ شەتتەتىلۋ سەبەپتەرىن ەگجەي-تەگجەيلى تالقىلاپ، ەكى تاراپىنىڭ اراسىنداعى تۇسىنىسپەۋشىلىكتىڭ قانداي كەزەڭدە تۇرعانىن ايتقان بولاتىن.
ماسەلەنى اشىپ الۋ ءۇشىن د.تاشىمبەتوۆا مەن ۇيىمداستىرۋ كوميتەتىنىڭ اراسىنداعى جۇمىس بارىسىنان بايانداپ وتسەك. 18 قاراشا كۇنى وتكەن «قازاقستان ارۋى -2022» فينالىنان كەيىن ۇيىمداستىرۋ كوميتەتى 24 قاراشا كۇنى «عالام ارۋى» الەمدىك بايقاۋىنان 2023 جىلعى بايقاۋ 14 قاڭتار كۇنى جاڭا ورلەاندا وتەتىندىگى تۋرالى حابارلاما الادى.
«25 قاراشا كۇنى ايتۋلى ماسەلە بويىنشا ۇيىمداستىرۋ كوميتەتىنىڭ مۇشەلەرى جينالىپ، اقىلداستار القاسىن وتكىزەدى. الايدا، ۋاقىتتىڭ تىعىزدىعى مەن قارجىلاندىرۋدىڭ جوقتىعىنا بايلانىستى د.تاشىمبەتوۆانى بيىل ەمەس، كەلەسى جىلى جىبەرۋ تۋرالى شەشىم قابىلداندى. ارتىنشا د. تاشىمبەتوۆا مەن ونىڭ اناسىنا شەشىم تۋرالى حابارلانعان. الايدا، ولار بۇل كەلىسىمشە كەلىسپەيتىندىكتەرىن جانە قارجىلاندىرۋدى ءوز موينىنا الاتىندىقتارىن مالىمدەدى. ءبىز ءوز تاراپىمىزدان بۇل شەشىمدى قابىلداپ، ونى دايىنداۋ جۇمىستارىنا كىرىسىپ كەتتىك. ءبىراق 2-3 كۇن وتپەستەن جاتىپ ق.تاشىمبەتوۆا (اناسى) كەلىپ قارجىلىق شىعىننىڭ كوپ ەكەندىگىن، تولىقتاي موينىنا المايتىندىعىن جانە ۇيىمداستىرۋ كوميتەتىنەن شىعىننىڭ 50% وتەۋىن تالاپ ەتتى. ناتيجەسىندە بىرنەشە كەزدەسۋلەر مەن كەلىسسوزدەر ءوتىزىلىپ، ءبىر شەشىمكە كەلە المادىق»،- دەيدى «قازاقستان ارۋى» ۇلتتىق سۇلۋلىق بايقاۋىنىڭ پرەزيدەنتى كاترين بەزۆەرحوۆا.
2022 جىلعى 6 جەلتوقساندا «"قازاقستان ارۋى" ۇيىمداستىرۋ كوميتەتى "عالام ارۋى قازاقستان-2022" جەڭىمپازى ديانا تاشىمبەتوۆا بيىلعى جىلى "عالام ارۋى – 2023" الەمدىك بايقاۋىنا دايىندالۋعا ۋاقىتتىڭ جەتىسپەۋىنە جانە قارجىلاندىرۋدىڭ بولماۋىنا بايلانىستى بارمايدى» دەگەن شەشىم قابىلدادى. بۇل تۋرالى 6 جەلتوقساندا د. تاشىمبەتوۆا حابارلانعان. ال، ءقازىر ولاردىڭ «بارمايتىندىعىن اقش-قا كەتەردەن 1 اپتا بۇرىن عانا ەستىدىك» دەگەن پايىمى شىندىققا جاناسپايدى. ونى دالەلدەيتىن دايەكتەردىڭ بارلىعى ىسكە تىگىلگەن. 2022 جىلدىڭ 26 قاراشاسىندا ديانا وتباسىمەن بىرگە اقش-قا كەتكەن. ال 29 قاراشادا استانا ۋاقىتى بويىنشا ساعات 00:00-دە ول Instagram-دا تىكەلەي ەفير وتكىزىپ، بايقاۋدىڭ بۇكىل ۇيىمداستىرۋ كوميتەتىن قارالايدى. سونداي-اق، تاشىمبەتوۆا ۇيىمداستىرۋ كوميتەتى ونى سۆەتلانا لوبودا ۇيىمداستىرعان كەشتە بولۋعا مىندەتتەگەنىن جانە ەرەسەك ەر ادامداردىڭ قاسىنا وتىرعىزعانىن ايتقان بولاتىن. شىن مانىندە بۇل شىندىققا جاناسپايتىن اقپارات.
«تۇيىندەپ ايتا كەتكىم كەلەدى – «قازاقستان ارۋى» بايقاۋىنىڭ ۇيىمداستىرۋشىلارى مەن قاتىسۋشىلارى سۆەتلانا لوبودانىڭ كونسەرتى مەن افتەپاتيىنە وزگە قوناقتاردىڭ قاتارىندا تەك قوناق رەتىندە قاتىستى. كەلىسىمشارتقا سايكەس لوبودانىڭ ۇيىمداستىرۋشىلارى توپ 12-گە كىرگەن جەڭىمپاز قىزدارعا كونسەرت پەن افتەپاتيگە بيلەت سىيلاعان بولاتىن. «استارلى اقيقات» باعدارلاماسىندا د.تاشىمبەتوۆا ايتقانداي ولاردى ول جەرگە ەشكىم ماجبۇرلەپ اپارعان جوق. بارلىعى تەك ءوز قالاۋلارىمەن باردى. ماسەلەن، 12 قىزدىڭ ىشىنەن 4ء-ى افتەپاتيگە بارعان جوق جانە ولاردى ەشكىم ماجبۇرلەمەدى. ءيا، ولاردىڭ قاىۋپسىزدىگىن قامتاماسىز ەتۋ ءۇشىن ءبىز ولارمەن بىرگە كاستينگ مەنەدجەردى بىرگە جىبەردىك. ولار كەش بويى بىرگە وتىرىپ، بىرگە قايتتى. سول سەبەپتى د.تاشىمبەتوۆانىڭ سول افتەپاتيدى بايقاۋ ۇيىمداستىرۋشىلارى ۇيىمداستىرىپ، سول جەرگە ۇلكەن ەركەكتەردى شاقىرىپ، تانىستىرماق بولدى دەگەن مالىمدەمەسى مۇلدەم شىندىققا جاناسپايدى. ايتا وتەيىك، 19 قاراشا كۇنى مەيرامحانا اشىق بولعان، ول جەردە جابىق كەش ۇيىمداستىرىلعان جوق. وندا بايقاۋ قاتىسۋشىلارىمەن قاتار بلوگەرلەر، لوبودانىڭ ارنايى قوناقتارى، سەرىكتەستەرىمەن قاتار مەيرامحانا قوناقتارى دا بولعان. سول سەبەپتى «قازاقستان ارۋى» بايقاۋى مەيرامحانا قوناقتارىنىڭ ارەكەتتەرىنە ەش جاۋاپ بەرمەيدى. ەڭ قىزىعى، ەگدە جاستاعى ەركەكتەر ءسوز سالدى دەگەن دايەكتى د.تاشىمبەتوۆادان باسقا ەشبىر قىز راستاماي وتىر»،- دەپ اتاپ ءوتتى ديرەكتور كاترين بەزۆەرحوۆا.
«قازاقستان ارۋى» ۇلتتىق سۇلۋلىق بايقاۋىنىڭ ۇيىمداستىرۋشىلارى «بايقاۋدى وتكىزۋ ەرەجەلەرى» قۇجاتىنىڭ تارماقتارىن نەگىزگە الا وتىرىپ، ديانا تاشىمبەتوۆانى «عالام ارۋى قازاقستان-2022» اتاعىنان ايىردى.
وسى قۇجاتتىڭ "ديسكۆاليفيكاسيالاۋ ءۇشىن نەگىزدەر" 12-بابىنىڭ 12.1-تارماعىندا " ۇيىمداستىرۋ كوميتەتى بايقاۋ وتكىزۋ ءتارتىبىن رەتتەيتىن قۇجاتتاردىڭ ەرەجەلەرىن بۇزاتىن، بايقاۋ ءىس-شارالارىنىڭ ءتارتىبىن ورىندامايتىن، قاتە مالىمەتتەر (نەمەسە ولاردى راستاۋ ءۇشىن قوسىمشا اقپارات پەن قۇجاتتار ۇسىنباعان) بەرگەن، بايقاۋدى تيىسىنشە وتكىزۋگە كەدەرگى كەلتىرەتىن باسقا دا ءتارتىپ بۇزۋشىلىقتارعا جول بەرگەن قاتىسۋشىلاردى بايقاۋدان شىعارىپ تاستاۋعا قۇقىلى دەلىنگەن. سول شارتتىڭ 12.2-تارماعىنا سايكەس «ديسكۆاليفيكاسيا تۋرالى شەشىم تۇپكىلىكتى بولىپ تابىلادى جانە ونى قايتا قاراۋ مۇمكىن ەمەس» دەلىنگەن.
ال، 2023 جىلعى 6 اقپاندا ءتۇسىرىلىپ، 15-16 اقپاندا ەفيرگە شىققان قتك تەلەارناسىنىڭ"استارلى اقيقات" باعدارلاماسىنا ديانا تاشىمبەتوۆا مەن ونىڭ اناسى قارلىعاش تاشىمبەتوۆا قوناققا كەلىپ، مۋزىكالىق ورىنداۋشى جان احمادييەۆپەن بىرگە بايقاۋدىڭ ۇيىمداستىرۋ كوميتەتىنە قاساقانا جالا جابادى جانە ونىڭ بەدەلىنە نۇقسان كەلتىرەدى. سول سەبەپتى ق. تاشىمبەتوۆا مەن ساراپشى رەتىندە قاتاسقان جان احمادييەۆكە قاتىستى سوتقا ارىز ءتۇسىرۋ تۋرالى شەشىم قابىلداندى. الايدا، سوتقا قاتىستى ناقتى شەشىم فيلولوگيالىق ساراپتامانىڭ ناتيجەسىنە بايلانىستى بولادى، - دەيدى ادۆوكاتتار قاۋىمى.
«ءقازىر ەكى بىردەي باعدارلاما مەن تىكەلەي ەفيردە ايتىلعان پىكىرلەردىڭ بارلىعى ارنايى ساراپشىلارعا جونەلتىلدى. ۇيىمنىڭ بەدەلىنە زالال كەلتىرۋ فاكتىسى دالەلدەنگەن جاعدايدا ءبىز دەرەۋ سوتقا شاعىپ تۇسىرۋگە دايىندالىپ جاتىرمىز»،- دەپ اتاپ ءوتتى «قازاقستان ارۋى» ۇلتتىق سۇلۋلىق بايقاۋىنىڭ ادۆوكاتى گاۋحار سالىمبايەۆا.
