World Gold Council دەرەكتەرىنە سايكەس، 2024 جىلدىڭ قورىتىندىسى بويىنشا الەمدە 3،7 مىڭ توننا التىن وندىرىلگەن، بۇل - وتكەن جىلمەن سالىستىرعاندا 0،6%-عا عانا ارتىق كولەم. ونىڭ 10،4% نەمەسە 380،2 توننانى قۇرايتىن جۇڭگو التىن وندىرىسىندە كوش باستاپ تۇر. قازاقستان بولسا، 14ء-شى ورىندا، دەپ حابارلايدى Dalanews.kz Energyprom.kz سايتىنا سىلتەمە جاساپ.
التىن ءوندىرىسى بويىنشا الەمدىك وندىق قاتارىنا مىنالار كىرەدى:
- جۇڭگو (380،2 توننا)،
- رەسەي(330توننا)،
- اۆستراليا(284توننا)،
- كانادا (202،1 توننا)،
- اقش(158توننا)،
- گانا (140،6 توننا)،
- مەكسيكا(140،3توننا)،
- يندونەزيا(140،1توننا)،
- پەرۋ (136،9 توننا)،
- وزبەكستان (129،1 توننا).
World Gold Council اقپاراتى بويىنشا، ءوندىرىس كولەمى 87 توننانى قامتيتىن قازاقستان 14-ورىندا ەكەن.
بۇل ارادا اتالعان ۇيىم التىن كەندەرىنىڭ نەمەسە جارتىلاي فابريكاتتاردىڭ ماسساسى ەمەس، تازارتىلعان التىنعا مۇمكىندىگىنشە جاقىن، وڭدەۋدەن كەيىنگى مەتالل تۋرالى ايتىپ وتىر.
"ءبىر قىزىعى،ق ر ۇلتتىق ستاتيستيكا بيۋروسىنىڭ دەرەكتەرىنە سايكەس،2024 جىلى قازاقستاندا World Gold Council ساراپشىلارىنىڭ پىكىرىنە قاراعاندا تازارتىلعان التىن ايتارلىقتاي از وندىرىلگەن: نەبارى 72،1 توننا ( ءبىر جىل بۇرىنعىعا قاراعاندا 1،5%-عا ارتىق). تمد مەملەكەتتەرى اراسىندا وندىرىلگەن التىن كولەمى بويىنشا قازاقستان ۇزدىك وندىققا ەنگەن رەسەي مەن وزبەكستانعا جول بەرىپ، 23،6 توننا باعالى مەتالل شىعارعان قىرعىزستاندى باسىپ وزادى. تمد-نىڭ باسقا ەلدەرىنە 14،2 توننا تيەسىلى، بۇل 2023 جىلداعى كورسەتكىشتەن 11،9%-عا نەداۋىر از.قازاقستان مەن قىرعىزستاندا،World Gold Council مالىمەتتەرىنە سايكەس، التىن ءوندىرىسى دە تومەندەگەن: تيىسىنشە 1،3% جانە 7،5%. رەسەي مەن وزبەكستاندا،كەرىسىنشە، ءوندىرىس كولەمى سايكەسىنشە 2،6%جانە7،9% ءوستى"، - دەيدى ماماندار.
دەگەنمەن، اقش گەولوگيالىق قىزمەتى قازاقستاندى 130 توننا وندىرگەن التىن كولەمى بويىنشا ۇزدىك وندىققا ەنگىزگەن. جالپى، وسى ۆەدومستۆونىڭ مالىمەتىنشە، الەمدە 3،3 مىڭ توننا التىن ءوندىرىلىپ، جۇڭگو (380 توننا)، رەسەي (310 توننا)، اۆستراليا (290 توننا)، كانادا (200 توننا) جانە اقش (160 توننا) الدىنا جان سالماي كەلەدى.
سونىمەن قاتار، قازاقستان سياقتى 130 توننادان التىن وندىرگەن مەكسيكا مەن گانا دا ەشكىمنەن قالىس قالماۋدا. وزبەكستان دا ۇزدىك وندىققا كىردى، بۇل رەتتەگى كولەم - 120 توننا.
بۇل ارادا اقش گەولوگيالىق قىزمەتى ۇكىمەتتەردىڭ رەسمي ەسەپتەرى نەگىزىندە دەرەكتەر ۇسىناتىنىن باسا ايتا كەتەلىك. سونىمەن، ۇلتتىق ستاتيستيكالىق بيۋروسىنىڭ اقپاراتىنا سايكەس، وڭدەلمەگەن جانە جارتىلاي وڭدەلگەن التىن، سونداي-اق ۇنتاق تۇرىندەگى التىن ءوندىرىسى كولەمى قازاقستاندا 2024 جىلى ءدال 130،3 توننانى قۇرادى (اقش گەولوگيالىق قىزمەتى دەرەكتەردى دوڭگەلەكتەپ الاتىنىن ەسكەرگەن ءجون). World Gold Council اقپاراتىنان ايىرماشىلىعى، ءبىز جوعارىدا ءتۇسىندىرىپ وتكەندەي، التىننىڭ تازا وڭدەلگەن ءتۇرىن سانايدى.
ۇلتتىق ستاتيستيكالىق بيۋروسى اقپاراتىنا سايكەس، 2025 جىلدىڭ قاڭتار–تامىز ايلارىندا ەلىمىزدە 85،9 توننا وڭدەلمەگەن جانە جارتىلاي وڭدەلگەن التىن، سونداي-اق التىن ۇنتاعى تۇرىندەگى التىن ءوندىرىلدى، بۇل وتكەن جىلدىڭ سايكەس كەزەڭىمەن سالىستىرعاندا 2،1%-عا از. ونىڭ ىشىندە تازارتىلعان التىننىڭ ۇلەسى - 48،2 توننا، بۇل وتكەن جىلمەن سالىستىرعاندا 2،5%-عا از. سونىمەن قاتار، التىننىڭ باعاسى تاريحي رەكوردتاردى جاڭارتۋدى جالعاستىرۋدا: 2025 جىلدىڭ قىركۇيەك ايىنىڭ سوڭىندا ول 3،9 مىڭ دوللارعا جەتتى. 2025 جىلدىڭ باسىندا التىننىڭ ءبىر ترويا ۋنسياسىنىڭ قۇنى 2،6 مىڭ دوللاردان ءسال استى، ياعني بۇل ارادا قىمباتشىلىق 50%-عا جۋىقتايدى. وعان جاھاندىق گەوساياسي تۇراقسىزدىق، اسكەري شىعىنداردىڭ ءوسۋى جانە ينۆەستورلاردىڭ اقشاسىن قورعانىس اكتيۆتەرگە قايتا كوشىرۋى تۇرتكى ەكەنى ايتىلادى.
