سەناتتىڭ پلەنارلىق وتىرىسىندا قازاقستان مەن حالىقارالىق قايتا قۇرۋ جانە دامۋ بانكى (حقدب) اراسىنداعى 46 ميلليارد تەڭگە كولەمىندەگى قارىز تۋرالى كەلىسىم راتيفيكاسيالاندى. قارجى "قازاقستاننىڭ ينكليۋزيۆتى ەكونوميكاسى ءۇشىن جەدەلدەتىلگەن سيفرلاندىرۋ" جوباسىن جۇزەگە اسىرۋعا باعىتتالماق، - دەپ حابارلايدى Dalanews.kz.

بۇل جوبانىڭ نەگىزگى ماقساتى – تۇراقتى سيفرلىق ينفراقۇرىلىمدى دامىتۋ ارقىلى اۋىلدىق ەلدى مەكەندەردى جوعارى جىلدامدىقتى ينتەرنەتپەن قامتاماسىز ەتۋ.

جوبا اياسىندا مىنا مىندەتتەر قاراستىرىلعان:

• قالا مەن اۋىل اراسىنداعى سيفرلىق تەڭسىزدىكتى ازايتۋ ءۇشىن شالعاي اۋىلداردى ينتەرنەتكە قوسۋ؛

• وڭىرلەردەگى شاعىن جانە ورتا بيزنەسكە، قاشىقتان قىزمەت كورسەتۋگە جانە ينۆەستيسيا تارتۋعا قولداۋ كورسەتۋ؛

• تەلەكوممۋنيكاسيالىق ينفراقۇرىلىمدى مەملەكەتتىك-جەكە سەرىكتەستىك نەگىزىندە دامىتۋ.

بۇل باستاما رەسپۋبليكالىق بيۋدجەتتەن قوسىمشا شىعىنداردى تالاپ ەتپەيدى جانە ەلدىڭ الەۋمەتتىك-ەكونوميكالىق جاعدايىنا كەرى اسەر ەتپەيتىنى ايتىلدى.