تاياۋدا موڭعوليانىڭ استاناسى ۇلانباتىر قالاسىندا ايگىلى التايست عالىم بۇقات ۇلى بازىلحان (1932-2012) مەن تۇركى اكادەمياسىنىڭ ساراپشىسى ناپيل بازىلحان دايىنداعان «قازاقشا-موڭعولشا سوزدىك» جانە «موڭعولشا-قازاقشا سوزدىك» جارىق كوردى، – دەپ حابارلايدى Dalanews.kz.
سوزدىكتەر ق ر پرەزيدەنتى قاسىم-جومارت توقايەۆتىڭ موڭعولياعا مەملەكەتتىك ساپارىنا وراي قازاقستان مەن موڭعوليانىڭ ءداستۇرلى دوستىق ىنتىماقتاستىعى اياسىندا موڭعوليا پرەزيدەنتى ۋحنااگيين حۇرەلسۇح قولداۋىمەن جاريالاندى. ەڭبەكتىڭ ءالعىسوزىن جازعان – موڭعوليا پرەزيدەنت كەڭسەسىنىڭ باسشىسى گومبوجاۆىن زاندانشاتار.
قوس سوزدىك – ءار بىرىنە 60 مىڭداي ءسوز قامتىلعان التايستيكا، تۇركولوگيا، قازاقتانۋ، موڭعولتانۋ سەكىلدى ءار سالالى زەرتتەۋلەرگە قۇرال بولاتىن لەكسيكوگرافيالىق تالاپتارعا ساي جۇزەگە اسقان باعالى عىلىمي ەڭبەك.
سوزدىكتى باسپاعا دايىنداۋ ءىسىن ۇيىمداستىرعان، موڭعول ءتىلى رەداكتورى – موڭعوليا پرەزيدەنتى جانىنداعى ءتىل ساياساتى ۇلتتىق كەڭەسىنىڭ جانە رەسمي ىستەر باسقارماسى جەتەكشىسى، فيلولوگيا عىلىمدارىنىڭ دوكتورى (PhD) نيامحۇۇگيين نارانگەرەل.
