ونەركاسىپتىك قاۋىپسىزدىكتى نىعايتۋ ستراتەگياسى اياسىندا كەنىشتىڭ مەديسينالىق پۋنكتى بازاسىندا «امتج» باعدارلامالىق-اپپاراتتىق كەشەنىن سىناقتان وتكىزۋ باستالدى. جوبا اۋىسىم الدىنداعى تەكسەرۋدى تولىق اۆتوماتتاندىرۋعا جانە جۇمىسقا رۇقسات بەرۋ كەزىندە ادام فاكتورىنا تاۋەلدىلىكتى جويۋعا باعىتتالعان، دەپ حابارلايدى Dalanews.kz
قىزمەتكەرگە اۋىسىم الدىندا جەدەل تەكسەرۋدەن وتۋگە مۇمكىندىك بەرەتىن ينتەللەكتۋالدى تەرمينال اۆتوماتتى تۇردە قان قىسىمىن، تامىر سوعىسى مەن دەنە تەمپەراتۋراسىن ولشەپ، الكوگولگە تەست جۇرگىزەدى. سونىمەن قاتار جۇمىسكەردىڭ شاعىمى مەن پسيحوفيزيولوگيالىق جاعدايى دا تالدانادى.
كەشەننىڭ نەگىزگى قىزمەتىنىڭ ءبىرى – كوز قاراشىعىنىڭ رەاكسياسىن باعالاۋ. بۇل شارشاۋ، كۇيزەلىس جانە تىيىم سالىنعان زاتتاردى قولدانۋ بەلگىلەرىن انىقتاۋعا مۇمكىندىك بەرەدى. ناتيجەسىندە قاۋىپسىزدىككە اسەر ەتۋى مۇمكىن جاعدايداعى قىزمەتكەردىڭ جۇمىسقا جىبەرىلۋ ءقاۋپى تومەندەيدى.
جۇيەنىڭ ماڭىزدى ەلەمەنتتەرىنىڭ ءبىرى – دەرەكتى جيناقتاۋ جانە وڭدەۋ قىزمەتى. بارلىق تەكسەرۋ ناتيجەسى پەرسونالدىڭ دەنساۋلىق جاعدايىن تالداۋ ءۇشىن قولدانىلاتىن ءبىرىڭعاي سيفرلىق بازاعا بىرىكتىرىلەدى. بۇل سوزىلمالى اۋىتقۋلاردى انىقتاۋعا، كورسەتكىشتەردىڭ ديناميكاسىن باقىلاۋعا جانە ىقتيمال ءقاۋىپ تۋرالى جۇمىسكەر مەن مەديسينالىق پەرسونالدى دەر كەزىندە حاباردار ەتۋگە مۇمكىندىك بەرەدى.
جۇيە تەك باقىلاۋدى عانا ەمەس، پروفيلاكتيكالىق قىزمەتتى دە اتقارادى. ول دەنساۋلىققا دەر كەزىندە نازار اۋدارۋعا جانە اۋرۋلاردىڭ دامۋ ءقاۋپىن ازايتۋعا كومەكتەسەدى.
«امتج» جۇيەسىن ەنگىزۋ ادام فاكتورىنان تۋىندايتىن توتەنشە وقيعالار سانىن ازايتۋعا، سونداي-اق ۇدەرىستى سيفرلاندىرۋ ارقىلى مەديسينالىق باقىلاۋدىڭ تيىمدىلىگىن ارتتىرۋعا باعىتتالعان.
تاجىريبەلىك-وندىرىستىك سىناق 2026 جىلعى مامىر ايىنىڭ سوڭىنا دەيىن جالعاسادى.
«امتج» جۇيەسىن پايدالانۋ – كاسىپورىننىڭ ەڭبەكتى قورعاۋدىڭ زاماناۋي ستاندارتىن دامىتۋعا، اۋرۋدىڭ الدىن الۋعا جانە وندىرىستىك جاراقاتتانۋدى بولدىرماۋعا قوسقان ناقتى ۇلەسى بولىپ سانالادى.
