Ónerkásiptik qaýipsizdikti nyǵaıtý strategıasy aıasynda kenishtiń medısınalyq pýnkti bazasynda «AMTJ» baǵdarlamalyq-apparattyq keshenin synaqtan ótkizý bastaldy. Joba aýysym aldyndaǵy tekserýdi tolyq avtomattandyrýǵa jáne jumysqa ruqsat berý kezinde adam faktoryna táýeldilikti joıýǵa baǵyttalǵan, dep habarlaıdy Dalanews.kz

Qyzmetkerge aýysym aldynda jedel tekserýden ótýge múmkindik beretin ıntellektýaldy termınal avtomatty túrde qan qysymyn, tamyr soǵysy men dene temperatýrasyn ólshep, alkogólge test júrgizedi. Sonymen qatar jumyskerdiń shaǵymy men psıhofızıologıalyq jaǵdaıy da taldanady.

Keshenniń negizgi qyzmetiniń biri – kóz qarashyǵynyń reaksıasyn baǵalaý. Bul sharshaý, kúızelis jáne tyıym salynǵan zattardy qoldaný belgilerin anyqtaýǵa múmkindik beredi. Nátıjesinde qaýipsizdikke áser etýi múmkin jaǵdaıdaǵy qyzmetkerdiń jumysqa jiberilý qaýpi tómendeıdi.

Júıeniń mańyzdy elementteriniń biri – derekti jınaqtaý jáne óńdeý qyzmeti. Barlyq tekserý nátıjesi personaldyń densaýlyq jaǵdaıyn taldaý úshin qoldanylatyn biryńǵaı sıfrlyq bazaǵa biriktiriledi. Bul sozylmaly aýytqýlardy anyqtaýǵa, kórsetkishterdiń dınamıkasyn baqylaýǵa jáne yqtımal qaýip týraly jumysker men medısınalyq personaldy der kezinde habardar etýge múmkindik beredi.

Júıe tek baqylaýdy ǵana emes, profılaktıkalyq qyzmetti de atqarady. Ol densaýlyqqa der kezinde nazar aýdarýǵa jáne aýrýlardyń damý qaýpin azaıtýǵa kómektesedi.

«AMTJ» júıesin engizý adam faktorynan týyndaıtyn tótenshe oqıǵalar sanyn azaıtýǵa, sondaı-aq úderisti sıfrlandyrý arqyly medısınalyq baqylaýdyń tıimdiligin arttyrýǵa baǵyttalǵan.

Tájirıbelik-óndiristik synaq 2026 jylǵy mamyr aıynyń sońyna deıin jalǵasady. 

«AMTJ» júıesin paıdalaný – kásiporynnyń eńbekti qorǵaýdyń zamanaýı standartyn damytýǵa, aýrýdyń aldyn alýǵa jáne óndiristik jaraqattanýdy boldyrmaýǵa qosqan naqty úlesi bolyp sanalady.