QazaqGaz 2026-2027 جىلدارى IPO-عا شىعارىلۋى مۇمكىن، دەپ حابارلايدى Dalanews.kz ينتەرفاكس-قازاقستان اگەنتتىگىنە سىلتەمە جاساپ.
"بۇگىنگى تاڭدا QazaqGaz-دىڭ IPO-سى جەكەشەلەندىرۋگە جاتاتىن اكتيۆتەر تىزىمىندە تۇر. الدىن الا مەرزىمى - 2026-2027 جىلدار"، دەلىنگەن ۇلتتىق كومپانيانىڭ اگەنتتىككە بەرگەن جاۋابىندا.
بۇعان دەيىن ۇكىمەتتە ەسەپ بەرگەن "QazaqGaz" ۇك" اق باسقارماسىنىڭ ءتوراعاسى سانجار جاركەشوۆ ۇلتتىق كومپانيا قارجىلىق ساۋىقتىرۋ كەزەڭىن اياقتاعاننان كەيىن، ترانسۇلتتىق جوبالاردى ىسكە قوسقانىن ايتقان ەدى. بۇل كومپانيانىڭ ينۆەستيسيالىق تارتىمدىلىعىن ەداۋىر ارتتىردى. ونىڭ ايتۋىنشا، اتالعان باستامالار پرەزيدەنتتىڭ ۇلتتىق كومپانيالاردى IPO-عا شىعۋعا دايىنداۋ تاپسىرماسىن ورىنداۋ اياسىندا جۇزەگە اسىرىلۋدا.
سونداي-اق، كومپانيانىڭ باعا ساياساتى جانە مونيتورينگ دەپارتامەنتىنىڭ ديرەكتورى نۇرسۇلتان ەشمۇحان باق-قا بەرگەن ءبىر سۇقباتىندا كومپانيانى بيرجاعا شىعارۋ تۋرالى "ءادىل گاز نارىعىن" قۇرىپ، شىعىنعا جۇمىس ىستەۋدەن ارىلعاننان كەيىن ءسوز قوزعاۋعا بولاتىنىن ايتقان ەدى. ياعني، گازدىڭ كوتەرمە باعاسىن ىرىقتاندىرۋ بۇل ارادا ماڭىزدى ءرول اتقارادى. ايتپەسە، قازىرگى ۋاقىتتا گازدىڭ وزىندىك قۇنى ىشكى نارىقتاعى ساتىلىم باعاسىنان جوعارى.
ايتا كەتسەك، 2024 جىلدىڭ سوڭىندا "سامۇرىق-قازىنا" مەملەكەتتىك قورى 2025 جىلى QazaqGaz اكسيالارىن بيرجاعا شىعارۋعا ءالى ەرتە، سوندىقتان IPO-نى وتكىزۋدى كەيىنگە شەگەرۋگە نيەتتى ەكەندىكتەرىن مالىمدەگەن. دەگەنمەن قور دا، ۇلتتىق كومپانيا دا بۇل شاراعا دايىندىق ءجۇرىپ جاتقانىن جوققا شىعارماعان.
QazaqGaz "سامۇرىق-قازىنا" مەملەكەتتىك قورىنىڭ پورتفەلدىك كومپانياسى بولىپ تابىلادى. كومپانيا ماگيسترالدىق گاز قۇبىرلارى مەن گاز تاراتۋ جەلىلەرى ارقىلى تاۋارلى گازدى تاسىمالداۋ جونىندەگى ورتالىقتاندىرىلعان ينفراقۇرىلىمدى باسقارادى، حالىقارالىق ءترانزيتتى قامتاماسىز ەتەدى جانە ىشكى جانە سىرتقى نارىقتاردا گاز ساتۋمەن اينالىسادى، قۇبىرلار مەن گاز قويمالارىن يگەرەدى، سالادى، قارجىلاندىرادى، جانە پايدالانادى.
