QazaqGaz 2026-2027 jyldary IPO-ǵa shyǵarylýy múmkin, dep habarlaidy Dalanews.kz Interfaks-Qazaqstan agenttigine silteme jasap.
"Búgingi tańda QazaqGaz-dyń IPO-sy jekeshelendirýge jatatyn aktivter tiziminde tur. Aldyn ala merzimi - 2026-2027 jyldar", delingen ulttyq kompaniianyń agenttikke bergen jaýabynda.
Buǵan deiin Úkimette esep bergen "QazaqGaz" UK" AQ Basqarmasynyń tóraǵasy Sanjar Jarkeshov ulttyq kompaniia qarjylyq saýyqtyrý kezeńin aiaqtaǵannan keiin, transulttyq jobalardy iske qosqanyn aitqan edi. Bul kompaniianyń investitsiialyq tartymdylyǵyn edáýir arttyrdy. Onyń aitýynsha, atalǵan bastamalar Prezidenttiń ulttyq kompaniialardy IPO-ǵa shyǵýǵa daiyndaý tapsyrmasyn oryndaý aiasynda júzege asyrylýda.
Sondai-aq, kompaniianyń Baǵa saiasaty jáne monitoring departamentiniń direktory Nursultan Eshmuhan BAQ-qa bergen bir suqbatynda kompaniiany birjaǵa shyǵarý týraly "ádil gaz naryǵyn" quryp, shyǵynǵa jumys isteýden arylǵannan keiin sóz qozǵaýǵa bolatynyn aitqan edi. Iaǵni, gazdyń kóterme baǵasyn yryqtandyrý bul arada mańyzdy ról atqarady. Áitpese, qazirgi ýaqytta gazdyń ózindik quny ishki naryqtaǵy satylym baǵasynan joǵary.
Aita ketsek, 2024 jyldyń sońynda "Samuryq-Qazyna" memlekettik qory 2025 jyly QazaqGaz aktsiialaryn birjaǵa shyǵarýǵa áli erte, sondyqtan IPO-ny ótkizýdi keiinge shegerýge nietti ekendikterin málimdegen. Degenmen qor da, ulttyq kompaniia da bul sharaǵa daiyndyq júrip jatqanyn joqqa shyǵarmaǵan.
QazaqGaz "Samuryq-Qazyna" memlekettik qorynyń portfeldik kompaniiasy bolyp tabylady. Kompaniia magistraldyq gaz qubyrlary men gaz taratý jelileri arqyly taýarly gazdy tasymaldaý jónindegi ortalyqtandyrylǵan infraqurylymdy basqarady, halyqaralyq tranzitti qamtamasyz etedi jáne ishki jáne syrtqy naryqtarda gaz satýmen ainalysady, qubyrlar men gaz qoimalaryn igeredi, salady, qarjylandyrady, jáne paidalanady.
