دوسىم ساتپايەۆ، شىن مانىسىندە، سىرتتان تۇرىپ سىناۋدى عانا بىلەدى. ايدان انىق فاكتىلەردى كونستاتاسيالاۋدىڭ حاس شەبەرى، دالەلدەردى قاجەت ەتپەيتىن، ەلگە ابدەن بەلگىلى بولعان پروبلەمالاردى مايىن تامىزىپ جاريالاۋدىڭ مامانى.
شىنىنا كەلگەندە، وتە ىڭعايلى پوزيسيا. بيلىك تاراپىنان پرەتەنزيا بولا قالسا، «مەن نە ىستەپ قويىپپىن، جۇرتتىڭ ءبارى سونى ايتىپ ءجۇر عوي» دەۋگە جاقسى.
ال سول ايتىلعان پروبلەمالاردى شەشۋدىڭ جولدارىن سۇراساڭ، ول بالانىڭ ايتارى جوق. قالبالاقتايدى دا قالادى. ونداي ادامداردى نەگىزىندە «پوپۋليست» دەيدى. ءبىراق، ادىلدىك ءۇشىن ايتا كەتەيىك، وقىعانى بار، كوزى اشىق، كەز كەلگەن تاقىرىپتى، كامپيت قۇساتىپ، ادەمى وراپ ساتا الاتىن دارىندى پوپۋليست.
ونى دا ءقويشىىزشى، ءقازىر كىم پوپۋليست بولماي ءجۇر. دوسىمنىڭ ومىرلىك پوزيسياسىندا مەنى ءبىرشاما كۇمانداندىراتىن ءبىر فاكت بار.
بۇل جىگىتتىڭ ساياساتتانۋشى اتانىپ، ەل الدىنا شىعىپ جۇرگەنىنە مىنە شيرەك عاسىردان استى. نەگىزگى قاۋزايتىن تاقىرىبى – قازاقستان، ونىڭ ىشكى، سىرتقى ساياساتى. وقىرماندارى دا نەگىزىنەن قازاق اۋديتورياسى. ءپىر تۇتاتىن دا سول قازاق.
ال سول دوسىمنىڭ، وسى ەلدىڭ ازاماتى بولىپ، وسى ەلدىڭ ساياسي ومىرىنە بەلسەندى ارالاسىپ ءجۇرىپ، سودان ءناپاقاسىن تاۋىپ ءجۇرىپ، ءوزى دە مەملەكەت قۇراۋشى ۇلتتىڭ وكىلى بولا تۇرىپ، سول ەلدىڭ مەملەكەتتىك ءتىلىن، ءوزىنىڭ انا ءتىلىن مەڭگەرىپ الۋعا زاۋقى جوق.
ءسويتىپ ءجۇرىپ دوسىم اعىلشىن ءتىلىن ۇيرەنگەنىن، باسقا دا تىلدەردى ءوز بەتىنشە يگەرىپ جۇرگەنىن كەز كەلگەن جەردە ماقتانىشپەن ايتادى.
دەمەك تىلدەرگە قابىلەتى جوق ەمەس، بار. بار بولسا دا، قازاق تىلىنە قۇلقى جوق. مۇنداي كوزقاراستى مەن نە ناقۇرىستىقتىڭ نىشانى نەمەسە ءوز ءتىلىنىڭ بولاشاعىنا سەنبەۋدىڭ، سودان بارىپ سىيلاماۋدىڭ بەلگىسى دەر ەدىم.
باسقالار ءۇشىن بۇل فاكت كورسەتكىش بولىپ كورىنبەۋى مۇمكىن، ارينە.
ءبىراق مەن ءۇشىن بۇل كورسەتكىش. ادامنىڭ ازاماتتىق پوزيسياسىنىڭ، قۇندىلىقتار جيىنتىعىنىڭ كورسەتكىشى، ۇلتىنا، ەلىنە دەگەن قاتىناسىنىڭ ولشەمى.
مەنىڭ ايتپاعىم، اعايىن، كىمنەن بولسا دا، مەيلى ول ساياساتكەر بولسىن، مەيلى اسپاز بولسىن، نە دەپۋتات بولسىن، قولدان ءپىر جاساعاندى قويساق.
ال سولار ءۇشىن جاعا جىرتىسۋدىڭ تىپتەن قاجەتى شامالى. سىيلاڭدار، سىيلاماڭدار، ۇناتىڭدار، ۇناتپاڭدار، تەك كوككە كوتەرمەڭدەر.
بۇل – جاقسى ادەت ەمەس. تالايدى ءپىر سانادىق قوي، سودان نە بولدى ال؟ ەستەرىڭىزدە بولسىن، پەرىشتەلەر قارا جەردى باسىپ جۇرمەيدى. ولاردىڭ مەكەنى باسقا جاقتا.
ال كەشەگى وقيعاعا قاتىستى ايتار بولسام، شىر-پىر بولۋعا ەش سەبەپ جوق. ادام ءوز ويىن ايتتى. قاجەت بولسا، دوسىم ءوزى-اق جاۋاپ بەرەر ايدوسقا.
