«100 جاڭا ەسىم» جوباسىنا لايىقتى، ەلىمىزدىڭ اتاق-ابىرويىن اسقاقتاتىپ جۇرگەن تالانتتاردىڭ ءبىرى – ماريا مۋدراك. ءيا، اتا-بابالارىمىز «قىز وسسە ەلدىڭ كوركى» دەپ بەكەر ايتپاعان. ال بويجەتكەن قىز ونەرپاز بولسا، بارشا جۇرتتىڭ ماقتانىشى بولماق. بۇلاي دەيتىن سەبەبىمىز، ماريا جاس كەزىندە-اق نيدەرلاندىنىڭ استاناسى امستەردامدا وتكەن «Beivebere» كلاسسيكالىق ءان بايقاۋىندا الەمنىڭ ون ۇزدىك سوپرانولاردىڭ قاتارىنا ەنىپ، ابىرويىمىزدى اسقاقتاتقانىن ۇمىتقان جوقپىز.
پاۆلوداردىڭ تۋماسى ماريا مۋدرياك 18 جاسىندا دجۋزەپپە ۆەردي اتىنداعى ميلان مەملەكەتتىك كونسەرۆاتورياسىن ءتامامداعان. ون جاسىندا لا سكالا تەاترىنىڭ جانىنداعى ميلاندىق جوعارى مۋزىكا مەكتەبىنە قابىلدانىپ، كەيىن مەملەكەتتىك كونسەرۆاتورياعا ءتۇسىپ، ەڭ جاس ستۋدەنت اتانعانى بەلگىلى.
وعان دەيىن، الەمنىڭ ەڭ جاس وپەرا ءانشىسى رەتىندە، ياعني بەس جاسىندا گيننەستىڭ رەكوردتار كىتابىنا ەندى.
«Beivebere» بايقاۋى الەمدەگى ەڭ بەدەلدى كلاسسيكالىق ءان بايقاۋى سانالادى. قازىرگى تاڭدا ەۋروپا مەن امەريكادا تانىمال انشىلەردىڭ بارلىعى وسى بايقاۋدان قانات قاعىپ، تانىمالدىلىققا يە بولعان. اتالمىش كونكۋرستىڭ ىرىكتەۋ كەزەڭى الەمنىڭ 50-دەن استام ەلدەرىندە وتكىزىلىپ، تەك جۇزدەن جۇيرىك، مىڭنان تۇلپار شىققاندار عانا بايقاۋدىڭ اقتىق كەزەڭىنە جىبەرىلەتىنىن ەسكەرسەك، ماريا ۇزدىكتەردىڭ قاتارىنان كورىنۋى ءۇشىن قانشالىقتى تەر توككەنىن بايقاۋعا بولادى.
ەلباسىمىز نۇرسۇلتان نازاربايەۆتىڭ ءوزى ءانشىنىڭ بەدەلدى ءان بايقاۋعا قاتىسۋىن ءجون كورىپ، ماريانىڭ امستەردامداعى ءاندوداعا بارۋ كەرەكتىگى تۋرالى كەڭەس بەرگەن.
ءانشىنىڭ اناسى ولگا گەنريح قىزى ماريا «Beivebere» بايقاۋىنا كۇنى-تۇنى دايىندالعانىن ايتقان-دى. «قىزىما ىرىكتەۋ كەزەڭىنەن ءوتۋ وتە قيىنعا سوقتى. سەبەبى، 500 قاتىسۋشىنىڭ ىشىنەن سۋىرىلىپ شىعۋ دەگەن ەكىنىڭ ءبىرىنىڭ قولىنان كەلمەسى انىق. ريم جانە ميلاندا وتكەن ىرىكتەۋ كەزەڭىندە ماريا جوعارى بالل الىپ، ءادىلقازىلاردىڭ وڭ باعاسىنا يە بولدى. ماريا ساحناعا قازاق ەلىنىڭ نامىسىن ارقالاپ شىقتى»، – سول ءبىر ساۋلەلى ءساتتى ەسكە الدى.
ماريا مۋدراكتىڭ اۋقىمدى ونەر دوداسىندا ۇزدىكتەر قاتارىنان كورىنۋى ونىڭ تالاي جىلعى ءبىلىمى مەن بىلىگىنىڭ ارقاسى ەكەندىگى امبەگە ايان. اتى كۇللى الەمگە ءماشھۇر بولعان ماريانىڭ داۋسىنا قازاق جۇرتى دا ىنتىق.
ەلباسى نۇرسۇلان نازاربايەۆ ۇسىنعان «100 جاڭا ەسىم» جوباسىنا مارياداي تالانتتى ۇل-قىزدارىمىز ويىپ تۇرىپ ورىن الۋى كەرەك. الەمدىك دەڭگەيدە كوتەرىلىپ، قازاقستاننىڭ اتىن الەمگە تانىتقان ونەر يەلەرى كوپ ەمەس. سوندىقتان مۇنداي اياۋلى قىزدارىمىزدى قۇرمەتتەپ، ولاردىڭ ءومىر جولىن وسكەلەڭ ۇرپاققا ۇلگى-ونەگە قىلىپ وتىرۋدىڭ ماڭىزى زور دەپ ەسەپتەيمىز.
نۇرلان جۇماحان
