سەنات دەپۋتاتى نۇرتورە ءجۇسىپ قازاق جازۋشىلارى ومىرگە كەلگەن اۋىلداردىڭ جابىلىپ جاتقانىن سىنعا الىپ، ۇكىمەت باسشىسى ولجاس بەكتەنوۆكە دەپۋتاتتىق ساۋال جولدادى، دەپ حابارلايدى Dalanews.kz.
ءسوز باسىن ول دەموگرافيالىق ساياساتتان باستادى. ونىڭ ايتۋىنشا،بۇل ماسەلەلەر ءالى كۇنگە دەيىن شەشىمىن تاپپاي كەلە جاتىر.
“ماسەلەن، ەلىمىزدە دەموگرافيالىق سالادا ۋاكىلەتتى ورگان انىقتالماعان. دەموگرافيالىق زەرتتەۋلەر جۇيەسىن بولجاۋ دا قۇرىلماعان. دەموگرافيالىق ساياسات ماسەلەلەرىندە مەملەكەتتىڭ ناقتى ۇستانىمى انىقتالماعان. سەناتتىڭ دەموگرافيا ساياساتىنا قاتىستى كوتەرگەن وزەكتى ماسەلەلەردىڭ ءبارىن ۇكىمەت ەلەمەيتىن بولسا، سىرعىتپا جاۋاپتارمەن قۇتىلسا، سوندا ۇكىمەت ساعاتىن نە ءۇشىن وتكىزدىك؟ ۇكىمەت بەرگەن جاۋاپ ءبىزدىڭ كوڭىلىمىزدى كونشىتپەيدى. دەموگرافيالىق سىن-قاتەرلەر، حالىقتىڭ قارتايۋى، باقىلانبايتىن ۋربانيزاسيا جانە كوشى-قون، حالىقتىڭ شامادان تىس ءولىمى ماسەلەلەرىنە جۇيەلى جانە شۇعىل شەشىمدەر قاجەت"، - دەدى سەناتور.
سەناتوردىڭ سوزىنشە، سوڭعى جىلدارى سولتۇستىك وڭىرلەردە ادامدار سانى كۇرت ازايعان.
"ۇلتتىق ستاتيستيكاسى بيۋروسىنىڭ دەرەگىنە سۇيەنسەك، سولتۇستىك قازاقستان وبلىسىندا كوشى-قون سالدوسى 2024 جىلعى 1 شىلدەدە تەرىس بولدى – مينۋس 3396 ادام. سونداي-اق سقو بويىنشا تابيعي ءوسىم مىڭ ادامعا شاققاندا تەرىس سالدوعا تەڭ – مينۋس 1،94 ادام. سولتۇستىك قازاقستان، قوستاناي جانە پاۆلودار وبلىستارىندا تۋعان ادامداردىڭ سانى جىل سايىن ازايىپ جاتىر"، - دەدى نۇرتورە ءجۇسىپ.
وسىعان بايلانىستى قازىرگى تاڭدا قازاق جازۋشىلارى تۋعان اۋىلدار جابىلىپ جاتقانىن العا تارتتى.
“قۇرمەتتى ولجاس اباي ۇلى، وڭىرلەرگە جۇمىس ساپارى بارىسىندا حالىقپەن كەزدەسۋلەر وتكىزىپ كەلدىك. دەموگرافياعا قاتىستى سۇراقتار تاعى الدىمىزدان شىقتى. مىسالى، سولتۇستىك قازاقستان وبلىسىنداعى ءسابيت مۇقانوۆ اۋىلى جابىلعان. حالىق جازۋشىسى سافۋان شايمەردەنوۆتىڭ اۋىلى جابىلۋعا جاقىن. ەڭبەك ەرى، قازاق ادەبيەتىنىڭ كلاسسيگى عابيت مۇسىرەپوۆ تۋعان جاڭا جول اۋىلىنىڭ دا تاعدىرى قىل ۇستىندە تۇر"، - دەپ قوستى دەپۋتات.
وسى تۇستا ول سولتۇستىك وڭىرلەردە الەۋمەتتىك-ەكونوميكالىق دامۋ باعدارلاماسىن دەرەۋ قولعا الۋدى، ايماقتارعا جاستاردى تارتۋ، زەينەتاقى جانە الەۋمەتتىك قىزمەتتەردى جاقسارتۋ بويىنشا ماسەلەلەردى جەدەل پىسىقتاپ، ناقتى شەشىمدەر قابىلدانۋى كەرەك ەكەنىن جەتكىزدى.
