كۇنى كەشە
تاتارستان استاناسى قازان قالاسىندا «KazakhExport» ەكسپورتتىق ساقتاندىرۋ كومپانياسىنىڭ وكىلدىگى اشىلدى.
اشىلۋ سالتاناتىنا تاتارستاننىڭ ساۋدا-وندىرىستىك پالاتاسى ءتوراعاسىنىڭ ءبىرىنشى ورىنباسارى ارتۋر نيكولايەۆ، قازاقستاننىڭ قازان قالاسىنداعى باس كونسۋلى ەركىن تۇقىموۆ جانە تاتار ەلىنىڭ بيزنەس وكىلدەرى قاتىستى.
ايتا كەتسەك وسىنىڭ الدىندا عانا قازانعا قازاقستان پرەزيدەنتى جۇمىس ساپارىمەن بارىپ، تاتارستان مەن قازاقستان اراسىنداعى ساۋدا اينالىمنىڭ كولەمىن 700 ملن-نان 1 ملرد دوللارعا دەيىن ءوسىرۋ قاجەتتىگىن تىلگە تيەك ەتكەن.
تاتارستاننىڭ ءوندىرىس جانە ساۋدا ۆيسە-مينيسترى گەرمان لەرنەر بۇل مەجەگە قول جەتكىزۋ ءۇشىن ءبىرقاتار شارالاردىڭ قولعا الىنعانىن ايتتى.
"بيىلعى جىلعى 6 ايدىڭ وزىندە ەكى ەلدىڭ اراسىنداعى ساۋدا اينالىمى 400 ملن-عا جەتتى. سالىستىرار بولسام، بىلتىرعى جىلعى ساۋدا اينالىمى تۇتاستاي العاندا 700 ملن-نىڭ توڭىرەگىندە بولدى"، – دەدى لەرنەر.
«رەسەي ەلىندەگى العاشقى وكىلدىگىمىزدى اشقالى وتىرمىز. بۇل ەكى جاقتى ساۋدا-ەكونوميكالىق بايلانىستاردى دامىتا تۇسەرى انىق. وسى ارقىلى جاڭا نارىقتى يگەرگىسى كەلەتىن ەكسپورتتاۋشىلاردى ساقتاندىرۋ تۇرعىسىنان قولدايتىن بولامىز. ءبىزدىڭ كومپانيانىڭ ماقساتى ەكونوميكانىڭ شيكىزاتتىق ەمەس سەكتورىنا جان ءبىتىرىپ، بۇل باعىتتاعى قىزمەت تۇرلەرىن دامىتۋ.
"KazakhExport" تاراپىنان قازاقستاندىق ەكسپورتاۋشىلارعا ارناپ جۇزەگە اسىرىلعان ساقتاندىرۋ قولداۋىنىڭ كولەمى بيىلعى جىلدىڭ 9 ايىندا عانا 100 ملن دوللاردان اسىپ جىعىلدى
»، – دەدى ءوز كەزەگىندە شارانىڭ شىمىلدىعىن تۇرگەن «KazakhExport» ەكسپورتتىق ساقتاندىرۋ كومپانياسىنىڭ باسقارما ءتوراعاسى رۋسلان ىسقاقوۆ.
ونىڭ اتاپ وتكەنىندەي، مۇنداي كەڭسەلەردىڭ كوپتەپ اشىلۋى كاسىپكەر مەن بانك اراسىنداعى بايلانىستى جاقسارتۋعا سەپتەسەدى. سونىمەن قاتار قازاقستاندا جاسالعان تاۋاردى تاسىمالداۋعا بولاتىن جاڭا نارىق كوزىن تابۋعا جول اشادى.
ىسقاقوۆتىڭ بۇلاي دەۋى بەكەر ەمەس.
قازانداعى «KazakhExport-تىڭ» وكىلدىگى تەك تاتارستانمەن عانا شەكتەلمەي، ونىمەن ىرگەلەس جاتقان ايماقتاردى دا قامتىماق. اتاپ ايتقاندا، نيجەگورود وبلىسى، باشقۇرتستان، ورىنبور، ورسكى، سامارا، ساراتوۆ وڭىرلەرى وسى وكىلدىكتىڭ قىزمەتىن پايدالانۋ مۇمكىندىگىنە يە بولادى.
قازىرگى كۇنى قازاقستان رەسەيلىك نارىققا نەگىزىنەن دارى-دارمەك، ءشاي-پاي، ازىق-تۇلىك ونىمدەرى، مەديسينالىق تەحنيكا، تراسفورماتورلى جانە كابەلدى قۇرىلعىلار، ونەركاسىپتىك ونىمدەر تاسىمالايدى.
ساراپشىلار پىكىرىنشە، قازاقستانداعى ماشينا قۇرىلىسى، اۋىل شارۋشىلىعى، حيميا جانە تاعام ءوندىرىنىڭ ەكسپورتتىق الەۋەتى زور.
ال رۋسلان ىسقاقوۆتىڭ ايتۋىنشا كومپانيانىڭ قازان قالاسىنداعى وكىلدىگى العاشقى ۋاقىتتا قازاقستاندىق كاسىپكەرلەرمەن جۇمىس ىستەۋگە نيەتتى ساتىپ الۋشىلار ءۇشىن اقپاراتتىق-ناسيحاتتىق جۇمىستارمەن اينالىساتىن بولادى.
تەك كەلەر جىلدان باستاپ وكىلدىككە بيزنەس-ارىپتەستەردىڭ سانىن ارتتىرۋ، ەكىجاقتى كەلىسىمگە قول جەتكىزۋ باعىتىندا ناقتى تالاپتار قويىلادى.
"قازانداعى وكىلدىكپەن شەكتەلىپ قالمايمىز. بولاشاقتا «KazakhExport-تىڭ» جالپى سانى 11 وكىلدىگىن اشۋ ويىمىزدا بار. بۇلاردىڭ تورتەۋى رەسەيدە، ونىڭ ىشىندە سىبىردە (ءجاڭاسىبىر)، ۋرالسكىدە (ەكاتەرينبۋرگۋ) جانە ماسكەۋدە اشىلاتىن بولادى. سونىمەن قاتار قاپقازدا، بەلورۋسسيا، ورتا ازيا ەلدەرىندە جانە جۇڭگو جەرىندە ءوز وكىلدىگىمىزدى اشۋدى جوسپارلاپ وتىرمىز. ايتپاقشى جىل اياعىنا دەيىن رەسەيدە «KazakhExport-تىڭ» تاعى ءبىر وكىلدىگى اشىلاتىن بولادى"، – دەدى رۋسلان ىسقاقوۆ.
Dalanews.kz انىقتاماسى:
«KazakhExport» ەكسپورتتىق ساقتاندىرۋ كومپانياسى» اق – «بايتەرەك» حولدينگىنىڭ ەنشىلەس كومپانياسى.
KazakhExport ەكونوميكانىڭ باسىم سەكتورلارىندا شيكىزاتتىق ەمەس تاۋارلاردىڭ، جۇمىستاردىڭ، قىزمەتتەردىڭ ەكسپورتىنىڭ وسۋىنە قولداۋ كورسەتۋمەن جانە قازاقستاندىق كاسىپورىندارعا قارجى-ساقتاندىرۋ جانە قارجىلاي ەمەس قولداۋ پراكتيكاسىن قالىپتاستىرۋمەن اينالىسادى.
فوتو: KazakhExport
