بۇدان بۇرىن زىريانداعى بىرنەشە وزەن ارناسىنان اسقان. 400-دەن اسا تۇرعىن - ءۇيدى سۋ شايعان. ءالى كۇنگە دەيىن 135 ءۇي سۋ استىندا.
وتكەن اپتادا اۋداننىڭ 811 تۇرعىنى قۇتقارىلدى. سوڭعى مالىمەتكە سايكەس 474 تۇرعىن ۇيلەرىنە ورالىپتى.
ءوڭىر باسشىسى دانيال احمەتوۆتىڭ ايتۋىنشا، زىرياندى قايتا سۋ باسۋى مۇمكىن.
- (زىرياندا) ءالى قار جاتىر. الداعى كۇندەرى كۇن جىلىنادى. وزەندەر تاعى ارناسىنان اسۋى مۇمكىن. بۇل بولجام عانا. دەگەنمەن، دايىن بولۋىمىز كەرەك. احۋال ءالى دە اۋىر. وسى سەبەپتە تۇرعىنداردى ءقاۋىپسىز جەرگە كوشىرەتىن مىڭداعان ورىن سايلاپ قويدىق"، – دەيدى احمەتوۆ.
اۋداندا تاسقىن زارداپتارىن جويۋعا 400-گە جۋىق ادام جۇمىلدىرىلعان. بۇلاردىڭ اراسىندا كوممۋنالدىق قىزمەت وكىلدەرى، قۇتقارۋشىلار مەن ەرىكتىلەر بار.
وسىنىڭ ناتيجەسىندە بىكوۆو اۋىلىنداعى سۋ شايىپ كەتكەن كوپىر قايتا قالپىنا كەلتىرىلدى. بۇدان سىرت بۇقتىرما، ۆتورۋشكا، گريانۋشكا وزەندەرىنىڭ جيەگىنە تاس توگىلىپ، قۇم قاپشىقتارمەن بەكىتىلدى.
كۇن كەشە مالەيەۆسك اۋىلىنداعى دامبىدان اسىپ توگىلگەن توگىلگەن سۋدىڭ بيىكتىگى 7 مەترگە جەتكەن. ءازىر سۋ قويماسىنىڭ ىرگەسىن بەكىتۋ ءارى ەرنەۋلەرىنە سۋ جىبەرەتىن قۇبىرلار ورناتۋ جۇمىسى جۇرگىزىلۋدە.
احمەتوۆ بۇگىن زىريان اۋدانىنا كەلدى. اكىم اۋدانداعى تاسقىن زارداپتارىن جويۋ ماقساتىنداعى جۇمىستارمەن تانىساتىن بولادى.
