قايرات ساتىبالدىنىڭ توقالى ماسكەۋدەگى قىمبات پاتەرىنەن ايىرىلدى. بۇل تۋرالى "ۆىحود ك موريۋ" Telegram-ارناسى جازدى، - دەپ حابارلايدى Dalanews.kz.
قازاقستان بيلىگى ەكس-پرەزيدەنت نازاربايەۆتىڭ تەرگەۋگە ىلىنگەن تۋىستارىنان عانا ەمەس، ولاردىڭ جاقىن ورتاسىنان دا اكتيۆتەردى قايتارىپ الىپ جاتىر. بىلتىر قاراشادا سىبايلاس جەمقورلىققا قارسى قىزمەت جاريالاعان روليكتە ۆەدومستۆو مەملەكەت پايداسىنا تاركىلەگەن "زاڭسىز ساتىپ الىنعان" اكتيۆتەر تۋرالى ايتىلادى. ولاردىڭ ىشىندە ماسكەۋدەگى "زولوتىە كليۋچي" ەليتالىق تۇرعىن ءۇي كەشەنىندەگى №25 پاتەر تۋرالى دا اقپارات بار.
"بۇعان دەيىن اۋدانى 272 شارشى مەتر بولاتىن جانە نارىقتاعى قۇنى 1 ميلليارد تەڭگەگە جۋىقتايتىن پاتەرگە نازاربايەۆتىڭ نەمەرە ءىنىسى قايرات ساتىبالدىنىڭ ايەلدەرىنىڭ ءبىرى مارسەلا (شىن تەگى - الەكساندروۆا، تاعى ءبىر تەگى - مارتيروسيان) يەلىك ەتكەن"، - دەپ جازدى ارنا.
"ۆىحود ك موريۋ" Telegram-ارناسى
مارسەلا قايرات ساتىبالدىنىڭ بەيرەسمي ايەلى ەكەنى بۇعان دەيىن دە ايتىلىپ ءجۇر. ول 1987 جىلى 26 قاراشادا گورودوۆيكوۆسكىدە دۇنيەگە كەلگەن. ول ءبىراز ۋاقىت ستاۆروپولدە تۇرىپ، سودان كەيىن ماسكەۋگە كوشكەن.
2022 جىلعى قىركۇيەكتە استاناداعى سوت قايرات ساتىبالدىنى التى جىلعا باس بوستاندىعىنان ايىرۋعا ۇكىم شىعاردى، ونىڭ مۇلكى تاركىلەندى جانە 10 جىل بويى مەملەكەتتىك قىزمەتتە جۇمىس ىستەۋگە تىيىم سالىندى. سوت بارىسىندا ساتىبالدى "قازاقتەلەكوم" جانە "كولىك سەرۆيس ورتالىعى" كومپانيالارىنا زالالدى وتەۋ رەتىندە ونداعان ميلليارد تەڭگە تولەگەنى مالىمدەلدى. تاراپتار مەدياتيۆتىك كەلىسىم جاساستى. ءقازىر وعان قاتىستى تاعى ءبىر قىلمىستىق ءىس تەرگەلىپ جاتىر.
