ىندەت جاستى دا، جاسامىستى دا جالماپ، اۋرۋحانادا وتتەگى اپپاراتى جەتىسپەي، توسەككە تاڭىلعان جۇرتتىڭ دەمى تارىلىپ، اجالمەن ارپالاسىپ جاتقان قىسىلتاياڭ شاقتا بەلگىلى ءدىنتانۋشى قايرات جولدىباي ۇلى ۇلكەن تاۋەكەلگە بەل بۋعان ەدى.
"ەمحانالاردا وتتەگى اپپاراتتارى جەتىسپەۋدە. ءولىم كوبەيدى... وسىنداي سىن ساتتە ءبىز نە ىستەي الامىز؟ ەلىمىزدە ءولىم سانىنىڭ كۇرت ارتۋى قاننىڭ قاجەتتى كەزدە وتتەگىمەن قانىقپاۋى سالدارىنان دا تۋىنداپ جاتىر.
ەندەشە، حارەكەت بىزدەن، بەرەكەت اللادان. كوپ تۇكىرسە كول دەيدى. ەلىمىزدەگى كاسىپكەر ازاماتتاردى، ونەر ادامدارىن، مۇمكىنشىلىگى بار ءاربىر جاندى وسىناۋ ساۋابى مول قايىرىمدىلىق شاراسىنا شاقىرامىن"، – دەگەن ءدىنتانۋشى قازىرگى ۋاقىتتا قازىرگى جەرگە تامباي تۇرعان قۇرىلعىنى ساتىپ الۋعا ارەكەت ەتىپ، ەلدەن جىلۋ جيناپ، يگىلىكتى ىسكە مۇرىندىق بولدى.
"جەلدەتكىشتەر (يۆل) وتە قىمبات جانە ولار تەك جانساقتاۋ بولىمىندە قولدانىلۋدا. الايدا قانداعى وتتەگىنىڭ تومەندەۋىنە جەتكىزبەي، ناۋقاستاردى جانساقتاۋ بولىمىنە اكەلمەي-اق ەمدەۋگە بولاتىن تاسىلدەرى بار ەكەن.
تىنىس الۋ جولدارى اۋرۋلارىنىڭ الدىن-الۋ ءۇشىن قولدانىلاتىن جانە قانداعى وتتەگىنىڭ دەڭگەيىن ۋاقىتىندا جوعارىلاتۋعا مۇمكىندىك بەرەتىن سۋ مەن اۋادان وتتەگى شىعاراتىن قۇرىلعىلار بار (وتتەگى كونسەنتراتورى). بۇل قانىقتىلىعى تومەن ناۋقاستارعا شىن مانىندە ءومىر ءسۇرۋ مۇمكىندىگىن بەرەدى. ال بۇل قۇرىلعىلاردىڭ باعاسى جەلدەتۋ قوندىرعىلارىنا (يۆل) قاراعاندا الدەقايدا ارزان"، – دەپ جازعان ەدى ءدىنتانۋشى جەلىدەگى پاراقشاسىندا.
قايرات جولدىباي ۇلى وسى ارقىلى كوروناۆيرۋس پاندەمياسى كەزىندە ءوزى سياقتى جاناشىر ادامداردى ءبىر ماقسات-مۇددەگە جۇمىلدىرا الاتىن قايراتكەرلىك قابىلەتىن تانىتا ءبىلدى. "كوپ تۇكىرسە كول" دەگەندەي ءدىنتانۋشىنىڭ باستاماسىن ەل بولىپ قولداپ، قولدان كەلگەنشە ءار ادام كومەك قولىن سوزا باستادى.
Dalanews.kz ءتىلشىسى قايرات مىرزاعا حابارلاسىپ، از-كەم اڭگىمە-دۇكەن قۇردى.
"قيىن ساتتە ەل ەكەنىمىزدى، ءبىر ەكەنىمىزدى كورسەتە بىلدىك. كەيبىر جاندار سوڭعى تيىنىنا دەيىن بىزگە بەرىپ جاتتى. ۇكىلەگەن ەل ءۇمىتىن اقتاۋعا تىرىسىپ جاتىرمىز. "شۇعىلا" قايىرىمدىلىق قورىمەن بىرگە حالىقتان 450 ميلليون تەڭگە جينالدى. سول قارجىعا 4 مىڭ دانا وتتەگى كونسەنتراتتارى ساتىپ الىندى"، – دەيدى قايرات جولدىباي ۇلى.
قىتايدىڭ گۋانچجوۋ قالاسىنان جەتكىزىلگەن 543 قۇرىلعى الماتى وبلىسى، تاراز قالاسى، شقو-عا جىبەرىلدى. وتتەگى كونسەنتراتورلارىنىڭ 1400 داناسى، ياعني، ەكىنشى پارتياسىنىڭ 740 اپپاراتى باتىس وڭىرىنە، قالعانى وڭتۇستىك وڭىرلەردەگى اۋرۋحانالارعا تاراتىلدى.
ۇيىمداستىرۋشىلار شەت ەل اسىپ كەلگەن قوندىرعىلاردىڭ اۋرۋحاناعا جەتكىزىلۋىن قاداعالاۋدا.
"ەندى 3ء-شى تامىز كۇنى 1000 دانا اپپاراتتىڭ كەلۋىن كۇتىپ وتىرمىز. ارنايى ازىرلەگەن جوسپار بويىنشا ەلوردامىز نۇر-سۇلتان قالاسىنا، سولتۇستىك قازاقستاننىڭ وڭىرىندەگى اۋدان-اۋىلدارعا جەتكىزۋ ويىمىزدا بار. حالىقتىڭ قارجىسىنا جينالعان وتتەگى كونسەنتراتتارىنىڭ سوڭعى پارتياسى 10-شى تامىز كۇنى كەلۋى كەرەك.
1000 دانا اپپارات شقو، الماتى وبلىسى جانە ەلىمىزدە وسىناۋ اپپاراتتار تاپشىلىق كورىپ جاتقان اۋرۋحانالارعا تاراتىلاتىن بولادى. سونىمەن ناۋقاستارلى قاجەت قوندىرعىمەن مۇمكىندىگىمىزشە قامتاماسىز ەتۋگە تىرىستىق دەپ ويلايمىن. ەڭ باستىسى ەل بولىپ كوروناۆيرۋستى توقتاتساق، ۇلكەن جەڭىسىمىز سول بولماق"، –دەپ پىكىرىن ءبىلدىردى قايرات جولدىباي ۇلى.
سىن ساعاتتا يگىلىكتى ءىستىڭ باسى قاسىندا بولىپ، تاۋەكەلگە بەل بۋىپ، اۋىر اماناتتى ارقالاپ، اۋرۋحانادا جەتىسپەي جاتقان وتتەگى اپپاراتىمەن قامتاماسىز ەتۋ ءۇشىن بارىن سالىپ، ناۋقاستارعا جەتۋىن ءجىتى قاداعالاۋدا.
قاراپايىم ادامدار، كاسىپكەرلەر، ونەر ادامدارى، شالعايداعى قازاقتان، قالاداعى اعايىنعا دەيىن قايرات جولدىباي ۇلىنىڭ ۇندەۋىنە قۇلاق اسىپ، قول ۇشىن سوزىپ، بۇگىندە اسا قاجەتتى وتتەگى اپپاراتىن ساتىپ الۋعا ءوز ۇلەستەرىن قوستى.
"ەلدەگى احۋالعا بەي-جاي قاراماعان جاناشىر ادامداردىڭ ارقاسىندا گۋانچجوۋداعى الەمدەگى ەڭ مىقتى دەگەن ۇشتىككە كىرەتىن كومپانيانى تاڭداپ، سول جەردەن جينالعان قاراجاتقا 4 مىڭ دانا وتتەگى كونسەتراتتارىنا قول جەتكىزدىك.
ۇندەۋدىڭ ناتيجەسىندە اۋىل-اۋىلدان، شالعايداعى ەلدىمەكەندەردەن حالىق جينالىپ، جاپپاي اقشا اۋداردى. وسى ۇلكەن ءىس-شاراعا اتسالىسقان ادامدارعا العىسىمىزدى بىلدىرەمىز. وسى قوندىرعىنىڭ ارقاسىندا كوپ ازاماتتار جانساقتاۋ بولىمىنە جەتپەي ايىعىپ، جازىلىپ كەتەدى.
اسىرەسە، پرەمەر ءمينيستردىڭ ورىنباسارى ەرالى لۇقپان ۇلى ەرەكشە قولداۋ ءبىلدىردى. ۇشاق بەرۋ، ۇيىمداستىرۋ، رۇقسات قاعازدارىن تەز راسىمدەۋگە كومەكتەسكەنىن اتاپ ايتقىم كەلەدى. بارشا كومەكتەسكەن ادامدارعا اللا رازى بولسىن"، – دەپ ريزاشىلىعىن ءبىلدىرىدى قايرات جولدىباي ۇلى.
ازىرلەگەن، قۋانىش راحمەتوللا ۇلى
