Indet jasty da, jasamysty da jalmap, aýrýhanada ottegi apparaty jetispei, tósekke tańylǵan jurttyń demi tarylyp, ajalmen arpalasyp jatqan qysyltaiań shaqta belgili dintanýshy Qairat Joldybaiuly úlken táýekelge bel býǵan edi.
"Emhanalarda ottegi apparattary jetispeýde. Ólim kóbeidi... Osyndai syn sátte biz ne istei alamyz? Elimizde ólim sanynyń kúrt artýy qannyń qajetti kezde ottegimen qanyqpaýy saldarynan da týyndap jatyr.
Endeshe, hareket bizden, bereket Alladan. Kóp túkirse kól deidi. Elimizdegi kásipker azamattardy, óner adamdaryn, múmkinshiligi bar árbir jandy osynaý saýaby mol qaiyrymdylyq sharasyna shaqyramyn", – degen dintanýshy qazirgi ýaqytta qazirgi jerge tambai turǵan qurylǵyny satyp alýǵa áreket etip, elden jylý jinap, igilikti iske muryndyq boldy.
"Jeldetkishter (IVL) óte qymbat jáne olar tek jansaqtaý bóliminde qoldanylýda. Alaida qandaǵy otteginiń tómendeýine jetkizbei, naýqastardy jansaqtaý bólimine ákelmei-aq emdeýge bolatyn tásilderi bar eken.
Tynys alý joldary aýrýlarynyń aldyn-alý úshin qoldanylatyn jáne qandaǵy otteginiń deńgeiin ýaqytynda joǵarylatýǵa múmkindik beretin sý men aýadan ottegi shyǵaratyn qurylǵylar bar (ottegi kontsentratory). Bul qanyqtylyǵy tómen naýqastarǵa shyn máninde ómir súrý múmkindigin beredi. Al bul qurylǵylardyń baǵasy jeldetý qondyrǵylaryna (IVL) qaraǵanda áldeqaida arzan", – dep jazǵan edi dintanýshy jelidegi paraqshasynda.
Qairat Joldybaiuly osy arqyly koronavirýs pandemiiasy kezinde ózi siiaqty janashyr adamdardy bir maqsat-múddege jumyldyra alatyn qairatkerlik qabiletin tanyta bildi. "Kóp túkirse kól" degendei dintanýshynyń bastamasyn el bolyp qoldap, qoldan kelgenshe ár adam kómek qolyn soza bastady.
Dalanews.kz tilshisi Qairat myrzaǵa habarlasyp, az-kem áńgime-dúken qurdy.
"Qiyn sátte el ekenimizdi, bir ekenimizdi kórsete bildik. Keibir jandar sońǵy tiynyna deiin bizge berip jatty. Úkilegen el úmitin aqtaýǵa tyrysyp jatyrmyz. "Shuǵyla" qaiyrymdylyq qorymen birge halyqtan 450 million teńge jinaldy. Sol qarjyǵa 4 myń dana ottegi kontsentrattary satyp alyndy", – deidi Qairat Joldybaiuly.
Qytaidyń Gýanchjoý qalasynan jetkizilgen 543 qurylǵy Almaty oblysy, Taraz qalasy, ShQO-ǵa jiberildi. Ottegi kontsentratorlarynyń 1400 danasy, iaǵni, ekinshi partiiasynyń 740 apparaty Batys óńirine, qalǵany Ońtústik óńirlerdegi aýrýhanalarǵa taratyldy.
Uiymdastyrýshylar shet el asyp kelgen qondyrǵylardyń aýrýhanaǵa jetkizilýin qadaǵalaýda.
"Endi 3-shi tamyz kúni 1000 dana apparattyń kelýin kútip otyrmyz. Arnaiy ázirlegen jospar boiynsha elordamyz Nur-Sultan qalasyna, Soltústik Qazaqstannyń óńirindegi aýdan-aýyldarǵa jetkizý oiymyzda bar. Halyqtyń qarjysyna jinalǵan ottegi kontsentrattarynyń sońǵy partiiasy 10-shy tamyz kúni kelýi kerek.
1000 dana apparat ShQO, Almaty oblysy jáne elimizde osynaý apparattar tapshylyq kórip jatqan aýrýhanalarǵa taratylatyn bolady. Sonymen naýqastarly qajet qondyrǵymen múmkindigimizshe qamtamasyz etýge tyrystyq dep oilaimyn. Eń bastysy el bolyp koronavirýsty toqtatsaq, úlken jeńisimiz sol bolmaq", –dep pikirin bildirdi Qairat Joldybaiuly.
Syn saǵatta igilikti istiń basy qasynda bolyp, táýekelge bel býyp, aýyr amanatty arqalap, aýrýhanada jetispei jatqan ottegi apparatymen qamtamasyz etý úshin baryn salyp, naýqastarǵa jetýin jiti qadaǵalaýda.
Qarapaiym adamdar, kásipkerler, óner adamdary, shalǵaidaǵy qazaqtan, qaladaǵy aǵaiynǵa deiin Qairat Joldybaiulynyń úndeýine qulaq asyp, qol ushyn sozyp, búginde asa qajetti ottegi apparatyn satyp alýǵa óz úlesterin qosty.
"Eldegi ahýalǵa bei-jai qaramaǵan janashyr adamdardyń arqasynda Gýanchjoýdaǵy álemdegi eń myqty degen úshtikke kiretin kompaniiany tańdap, sol jerden jinalǵan qarajatqa 4 myń dana ottegi kontsetrattaryna qol jetkizdik.
Úndeýdiń nátijesinde aýyl-aýyldan, shalǵaidaǵy eldimekenderden halyq jinalyp, jappai aqsha aýdardy. Osy úlken is-sharaǵa atsalysqan adamdarǵa alǵysymyzdy bildiremiz. Osy qondyrǵynyń arqasynda kóp azamattar jansaqtaý bólimine jetpei aiyǵyp, jazylyp ketedi.
Ásirese, premer ministrdiń orynbasary Eraly Luqpanuly erekshe qoldaý bildirdi. Ushaq berý, uiymdastyrý, ruqsat qaǵazdaryn tez rásimdeýge kómekteskenin atap aitqym keledi. Barsha kómektesken adamdarǵa Alla razy bolsyn", – dep rizashylyǵyn bildiridi Qairat Joldybaiuly.
Ázirlegen, Qýanysh RAHMETOLLAULY
