"قازاقستان رەسپۋبليكاسى اۋماعىندا وندىرىلەتىن جەكەلەگەن دوڭعالاقتى كولىك قۇرالدارىنا قاتىستى مىندەتتى تالاپتاردى قولدانۋ جانە ولاردىڭ سايكەستىگىنە باعالاۋ جۇرگىزۋ قاعيدالارىن بەكىتۋ تۋرالى" 22 قازاندا جاريالانعان ۇكىمەت قاۋلىسى بويىنشا، قازاقستاندا اۆتوكولىكتى ەڭ تومەنگى"ەۋرو - 0-گە" دەيىنگى ەكولوگيالىق تالاپپەن شىعارۋعا بولادى.
بۇل وزگەرىس بويىنشا، قاۋىپسىزدىك جاستىعى، انتيبلوك جۇيەسى، تەجەگىش كەزىندە دوڭعالاقتى بلوكتاماۋ تەتىگى، جەدەل قىزمەت شاقىرعىش قۇرىلعىسى بولماسا دا اۆتوكولىك شىعارۋعا رۇقسات ەتىلەدى.
پرەمەر-مينيستر ءاليحان سمايىلوۆ قول قويعان جاڭا ەرەجە 15 قاراشادان باستاپ كۇشىنە ەنەدى.
باتىس سانكسياسى قاتايعان شاقتا بيىل مامىر ايىندا رەسەي دە وسىعان ۇقساس شەشىم شىعارعان.
ەۋرازيا ەكونوميكا كەڭەسى بيىل ءساۋىر ايىنان باستاپ 2023 جىلدىڭ 1 اقپانىنا دەيىن اۆتوكولىكتى ەۋرازيا ەكونوميكا كەڭەسى تەحنيكالىق رەگلامەنتىنىڭ ءبىرىڭعاي تالاپتارىنان وزگە ۇلتتىق زاڭناما تالاپتارى بويىنشا اۆتوكولىك شىعارا بەرۋگە رۇقسات بەرگەن.
2021 جىلى قازاقستان بيلىگى قوستاناي قالاسىندا "لادا" كولىگىن شىعاراتىن بىرلەسكەن زاۋىت سالاتىنىن حابارلاعان. قازاقستاننىڭ يندۋستريا جانە ينفراقۇرىلىمدىق دامۋ مينيسترلىگىنىڭ حابارىنا قاراعاندا، "جەڭىلدەتىلگەن كومپلەكتاسيا تالاپتارىنىڭ Hyundai سياقتى شەتەلدىك ماركالارعا قاتىسى بولمايدى.
باتىس ەلدەرىندە "ەۋرو-0" 1992 جىلعا دەيىن، "ەۆرو-1" 1995 جىلعا دەيىن قولدانىستا بولعان. قازاقستان "ەۋرو-2" ستاندارتىنان تومەن كولىكتى ەلگە اكەلۋگە 2009 جىلى تىيىم سالعان. ودان بەرى جوعارى حالىقارالىق ەكولوگيالىق تالاپتار قويا باستاعان ەدى.
