الەۋمەتتىك جەلىدە ستاديوندا تۋ الىپ جۇرگەن اسكەريلەردىڭ ۆيدەوسى جۇرتتىڭ سىنىنا قالعانى بەلگىلى. بۇل كەلەڭسىزدىك ءبىراز ادامنىڭ كۇلكىسىن كەلتىرسە، اسكەريلەردىڭ اشۋىن تۋعىزعان.

«Turkistan Zaman» اقپاراتتىق اگەنتتىگى بولعان جايتتىڭ ءمان-جايىن انىقتاۋ ماقساتىندا ۇيىمداستىرۋشىلاردىڭ باسپا ءسوز قىزمەتىنە حابارلاسقان بولاتىن.

«ق ر XI جازعى ۋنيۆەرسياداسىنىڭ رەسمي اشىلۋ سالتاناتى تۇركىستان قالاسىنداعى تۇركىستان ارەنا ستاديونىنىندا وتكىزىلگەن بولاتىن» دەپ حابارلايدى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ باسپا ءسوز قىزمەتى.

باسپا ءسوز قىزمەتىنىڭ مالىمەتىنشە، اتالعان شارادا ق ر مەملەكەتتىك تۋىن الىپ جۇرگەن تۇلعالار كاسىبي اسكەري قىزمەتكەر ەمەس، ستۋدەنتتەر ەكەن. سونداي-اق ساپتىق ادىممەن ءجۇرۋ كەزىندە قاتتى جەلدىڭ سالدارىنان «اسكەري پارادتىڭ» ءجۇرىسى بىركەلكى بولماعان.

اتاپ وتەيىك، تۇركىستان قالاسىندا سوڭعى 3-4 تاۋلىك قاتتى جەل سوعىپ تۇر. سەناريي بويىنشا ۇزاقتىعى 150 مەتردەي ساپتىق ءجۇرۋ كەزىندە، جەلدىڭ وتە قاتتى تۇرۋىنا بايلانىستى ستۋدەنتتەر اسكەري ءجۇرىستىڭ ءتارتىبىن بۇزۋعا ءماجبۇر بولعان.

ال ق ر قورعانىس مينيسترلىگىنىڭ باسپا ءسوز قىزمەتى قارۋلى كۇشتەرگە، باسقا دا اسكەرلەر مەن اسكەري قۇرالىمدارعا قاتىسى جوق ادامدارعا ارنايى بەلگىلەرى بار اسكەري نىساندى كيىمدى كيۋگە قولدانىستاعى زاڭنامادا جول بەرىلمەيتىنىن اتاپ ءوتتى.