شىعىس قازاقستان وبلىسىندا «قوناق وتباسى» اتتى ەرەكشە جوبا جۇزەگە اسىپ جاتىر. جوبا بويىنشا ورىس ءتىلدى وتباسىلاردىڭ بالالارى قازاق ءتىلىن ۇيرەنۋ ءۇشىن ارنايى قازاق وتباسىلارىنا بارىپ، سوندا بىرنەشە اپتا تۇرادى. قازاق ءتىلىن تەز ءارى تابيعي تۇردە ۇيرەنگەن بالالار ءوز وتباسىلارىنا كەرەمەت اسەرمەن ورالۋدا، دەپ حابارلايدى Dalanews.kz Kazpravda-عا سىلتەپ.

جوبا العاش رەت 2023 جىلى قولعا الىنىپ، وسكەمەن مەن التاي قالاسىنان 67 بالا كاتونقاراعاي اۋدانىنا بارعان. ولار 20 كۇن بويى جەرگىلىكتى قازاق وتباسىلارىنىڭ ورتاسىندا بولىپ، قازاق ءتىلىن ەركىن مەڭگەرىپ شىقتى. ۇيىمداستىرۋشىلاردىڭ ءوزى مۇنداي جوعارى ناتيجە كۇتپەگەن ەدى.

2024 جىلى جوباعا قاتىسقان بالالار سانى ەكى ەسەگە جۋىق ارتىپ، 120-عا جەتكەن. ال بيىلعى جازدا 140 ءجاسوسپىرىم قازاق ءتىلىن مەڭگەرۋ ءۇشىن كاتونقاراعايدا تۇرىپ قايتتى.

ماۋسىم ايىندا وسكەمەن، ريددەر، شەمونايحا، التاي جانە گلۋبوكوە اۋداندارىنان كەلگەن 11–12 جاستاعى بالالار كاتونقاراعاي اۋدانىنداعى قازاق وتباسىلارىنا بارىپ، ەكى اپتا بويى قازاقي تۇرمىستىڭ قىر-سىرىن ۇيرەنگەن. سونداي-اق، كەرىسىنشە، زايسان مەن تارباعاتاي اۋداندارىنان كەلگەن قازاق بالالارى شەمونايحا اۋدانىنىڭ ورىس ءتىلدى اۋىلىنا قوناق بولىپ بارعان.

جوباعا قاتىسقان وقۋشىلاردىڭ ءبىرى – التىنشى سىنىپتىڭ وقۋشىسى ساشا بوريسوۆ ساپاردان العان اسەرىمەن ءبولىستى:

"العاشىندا بارۋعا جۇرەكسىندىم. كەيىن ۇيگە قايتار كەزدە ءتىپتى قيماي قالدىم. قازاق تىلىنەن ارنايى ساباقتار وتكەن جوقپىز. ءبىراق قورشاعان ورتا تۇگەل قازاقشا سويلەگەندىكتەن، سوزدەردى جىلدام ەستە ساقتاپ الدىم. نۇرگۇل اپاي سيىر ساۋادى، مەن «سيىر ساۋۋ» دەگەن ءسوزدى سولاي ۇيرەندىم. دوسىم جىگەر اتتى ەرتتەدى، «اتقا ءمىنۋ» دەپ ايتىلاتىنىن ۇقتىم. قازاقشا ەت دايىنداۋدى ۇيرەندىم، قامىر جايۋدى ءبىلدىم. بۇل جاقتىڭ باستى تاعامى وسى ەكەن. كاتونقاراعايدا سارىمساق دەگەن ەرەكشە پياز قوسادى"، – دەيدى ساشا.

بالانىڭ اناسى مارينا بوريسوۆا دا ۇلىنىڭ قازاق وتباسىنان ورالعاننان كەيىنگى وزگەرىستەرگە ءدان ريزا:

"قازاق وتباسىنا، اسىرەسە بىزگە ۋاقىتشا انا بولعان كىسىگە العىسىم شەكسىز. بالام زور اسەرمەن، جاڭا دوستارمەن، جاڭا بىلىممەن ورالدى. ءقازىر دوستارىمەن كۇن سايىن قازاقشا سويلەسىپ تۇرادى"، – دەپ قۋانىشىمەن ءبولىستى.

جوبانىڭ باستى ماقساتى – بالالاردى ەشقانداي قىسىمسىز، ەركىن ورتادا مەملەكەتتىك تىلدە سويلەۋگە ۇيرەتۋ. بالالار ەكى اپتادا تەك قازاق ءتىلىن مەڭگەرىپ قانا قويماي، قازاق حالقىنىڭ داستۇرىمەن دە جاقىن تانىسىپ، ۇلتتىق مادەنيەتتى بويىنا ءسىڭىرىپ كەلەدى.

ۇيىمداستىرۋشىلاردىڭ ايتۋىنشا، جوبا جىل سايىن جالعاسىپ، اۋقىمى كەڭەيە بەرمەك.