– بارشاڭىزدى مۇباراك رامازان ايىنىڭ كەلۋىمەن شىن جۇرەكتەن قۇتتىقتايمىن! ۇلى جاراتۋشىنىڭ پەندەلەرىنە تارتقان تەڭدەسسىز سىيى — قاسيەتتى رامازان – سانسىز سەزىمدەر مەن تولىپ تاسىعان ىزگى ويلاردىڭ سالتانات قۇرعان، كۇن مەن ءتۇن دە تۇتاستاي جاساعان يەمىزدىڭ راقىمى مەن مەيىرىمىنە تۇنعان اي. باسقا ۋاقىتپەن سالىستىرعاندا، جاقسىلىقتار مەن ساۋاپتاردىڭ سانسىز ەسەلەنىپ جازىلار ايى دا وسى – رامازان. ورازا ادام جانىن تازارتىپ، جامان قىلىقتاردان ساقتايدى، – دەدى تۇركىستان وبلىسىنىڭ باس يمامى.
مۇسابەك اقتامبەردى كاسىپكەر جومارت، جاناشىر ازاماتتاردى، كومەككە مۇقتاج جاندارعا قامقورلىق كورسەتۋگە، قايىرىمدىلىق جاساۋعا، جەتىم مەن جەسىرگە مەيىرىمدىلىك تانىتىپ، قاراۋسىز قالعان قارتتارعا كوڭىل بولۋگە شاقىردى.
تۇركىستان قالالىق ورتالىق «حيلۋەت» مەشىتىنىڭ باس يمامى جۇسىپبەك ايداربەك ۇلى قاسىمبەكوۆ، تۇركىستان قالالىق ەڭبەك جانە سوعىس ارداگەرلەر كەڭەسىنىڭ ءتوراعاسى جارقىنبەك قۇلبايمبەتوۆ جانە وبلىستىق اقساقالدار القاسىنىڭ ءتوراعاسى جارىلقاسىن ازىرەتبەرگەنوۆ تە باسپا ءسوز ءماسليحاتىندا جۋرناليستەر سۇراعىنا جاۋاپ بەردى. سونىمەن قاتار، قاسيەتتى ايدا تەك قانا ىشىپ-جەۋدەن عانا ەمەس، وسەك-عايبات سىندى جامان ادەت-قىلىقتاردان اۋلاق بولۋدى ايتتى. ويتكەنى، ورازا - تەك ىشىپ-جەۋدەن تىيىلۋ ءۇشىن عانا ەمەس، سونداي-اق، قۇلاق، كوز، اۋىز كۇنالارىنان دا ساقتانۋ ءۇشىن ۇستالادى. سول ءۇشىن قۇلشىلىق امالدارىمىزدى كوبەيتىپ، كوبىرەك اللانى ەسكە الىپ، جيىرەك قۇران وقىعان ابزال ەكەندىگىن جەتكىزدى ءدىن وكىلدەرى.
ال زەكەت بەرۋ – جاعدايى كەلگەن (شاريعات بويىنشا نيساپ مولشەرىنە جەتكەن) مۇسىلمانعا پارىز. باس يمام زەكەت بەرەكەلى رامازان ايىندا بەرىلسە، ونىڭ دا ساۋابى ەسەلەنىپ جازىلاتىنىن ايتتى.
تۇركىستان وبلىسى اكىمىنىڭ باسپا ءسوز قىزمەتى
