الماتىدا ورىن العان وقيعاعا قاتىستى ينتەرنەتتە جالعان اقپارات تاراتقاندار، سونداي-اق، كۋاگەرلەردىڭ تەكسەرىلمەگەن سۇحباتىن جاريالاعان تۇلعالارعا قاتىستى قىلمىستىق ءىس قوزعالدى. بۇل تۋرالى بۇگىن وتىرىسىنان سوڭ، جۋرناليستەردىڭ سۇراعىنا جاۋاپ بەرگەن ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى.

ءمينيستردىڭ ايتۋىنشا، ول كەشە ءتۇن ورتاسىنا دەيىن وتىرىپ، الماتىدا ورىن العان وقيعالاردىڭ بەينە جانە فوتوجازبالارىن تۇگەل قاراپ شىققان.

مىسال رەتىندە مينيستر اتىس كەزىندە المالى اۋداندىق ىشكى ىستەر ءبولىمىنىڭ ماڭىندا ءجۇردىم دەگەن ايەلدىڭ سۇحباتىن ايتىپ وتىر. ول ايەلدىڭ ايتۋىنشا، قىلمىسكەر «اللا ۋاكبار» دەپ ايقايلاعان.

ايتا كەتەيىك، «ترۋبينا» گازەتىنىڭ بۇرىنعى باس رەداكتورى المات ازادي دە بۇگىن ءوزى جازعان  ماتەريالىندا قىلمىسكەر «اللا ۋاكبار» دەپ ايقايلاعانىن ەستىدىم دەپ جازعان.

«بەينەكامەرانىڭ جازباسىندا مەن ونداي ەشتەڭە ەستىگەن جوقپىن... بۇل بارىپ تۇرعان وتىرىك. جانە بۇل سۇحبات (كۋاگەر ايەلدىڭ - اگەنتتىك) ينتەرنەتكە شىققان. ودان كەيىن سۋپەرماركەتتە حالىق تۇتقىنعا الىندى دەگەن اقپارات تارادى. بۇل اقپارات تا ينتەرنەت ارقىلى تارادى. ءبىز ءقازىر ول اقپاراتتاردى تەكسەرۋ ءۇشىن ادامدارىمىزدى جىبەردىك. ءقازىر جالعان اقپارات تاراتقان ادامدارعا قاتىستى قىلمىستىق ءىس قوزعادىق جانە سول بلوگەرلەر مەن تىلشىگە ادۆوكات ىزدەي بەرۋگە كەڭەس بەرەمىن»، - دەدى ق.قاسىموۆ.

دەرەككوز: قازاقپارات