مەملەكەت باسشىسىنىڭ تۇركيا رەسپۋبليكاسىنا رەسمي ساپارى وسى ەلدىڭ نەگىزىن قالاۋشى ءارى تۇڭعىش پرەزيدەنتى مۇستافا كەمال اتاتۇرىكتىڭ كەسەنەسىنەن باستالدى، دەپ حابارلايدى Dalanews.kz.
اقوردا باسپا ءسوز قىزمەتىنىڭ حابارلاۋىنشا، قازاقستان پرەزيدەنتى ءانىتقابىر كەسەنەسىنە جەرلەنگەن ۇلى قايراتكەردىڭ رۋحىنا تاعزىم ەتىپ، قۇرمەتتى قوناقتار كىتابىنا قولتاڭبا قالدىردى.
قاسىم-جومارت توقايەۆ قازاقستان مەن تۇركيانىڭ دوستىعى نىعايا بەرەتىنىنە سەنىم ءبىلدىرىپ، باۋىرلاس تۇرىك حالقىنىڭ وسىپ-وركەندەۋىنە تىلەكتەستىگىن جەتكىزدى.
گۇل شوعىن قويۋ راسىمىنە قازاقستاننىڭ رەسمي دەلەگاسياسىنىڭ مۇشەلەرى دە قاتىستى.
ايتا كەتسەك، كەشە تۇندە قازاقستان پرەزيدەنتى تۇركياعا رەسمي ساپارمەن باردى. مەملەكەت باسشىسىن انكارا قالاسىنىڭ "ەسەنبوعا" اۋەجايىندا تۇركيا پرەزيدەنتى رەجەپ تاييپ ەردوعاننىڭ ءوزى ارنايى قارسى العان بولاتىن. سونداي-اق ساياساتتانۋشى اسحات قاسەنعلي مەملەكەت باسشىسىنىڭ انكاراعا ساپارىنا قاتىستى پىكىر ءبىلدىردى.
