جەتىسۋ وبلىسىنىڭ اكىمى بەيبىت يسابايەۆتىڭ ايتۋىنشا، ايماق ەكونوميكاسىنىڭ بارلىق نەگىزگى سالاسىنىڭ دامۋىندا وڭ ءۇردىس ساقتالىپ وتىرعانىن ايتتى.
وبلىستاعى ءوندىرىس كولەمى 5،8 پايىزعا، اۋىل شارۋاشىلىعى 1،7 پايىزعا ۇلعايعان. ال ساۋدا مەن قۇرىلىس سالالارىنىڭ دامۋ كورسەتكىشتەرى 1،6 ەسە ءوستى. 198،4 مىڭ شارشى مەتر تۇرعىن ءۇي پايدالانۋعا بەرىلگەن. بۇل 2022 جىلدىڭ وسى كەزەڭىمەن سالىستىرعاندا 11،2 پايىزعا كوپ.
سونىمەن قاتار بەيبىت يسابايەۆ وبلىس ەكونوميكاسىنا 213،9 ميلليارد تەڭگە ينۆەستيسيا تارتىلعان، سونىڭ ىشىندە جەكە ينۆەستيسيالار 15،7 پايىزعا كوبەيگەنىن جەتكىزدى. وبلىستىڭ ونەركاسىپ وندىرىسىندە 533 كاسىپورىن جۇمىس ىستەسە، مۇندا 26،6 مىڭ ادام تۇراقتى تۇردە جۇمىس ىستەيدى.
بيىل جەتىسۋ وبلىسىندا جالپى قۇنى 46،9 ميلليارد تەڭگە بولاتىن 14 نىساندى ىسكە قوسۋ جوسپارلانعان.
وبلىستا اۋىل شارۋاشىلىعىنىڭ جالپى ءونىمى 1،7 پايىزعا وسكەن. ونىڭ ىشىندە ەگىن القابى 1،9 مىڭ گەكتارعا ۇلعايعان، ال قانت قىزىلشاسىن وسىرەتىن جەر كولەمى 2 ەسە ارتىپ، 8،7 مىڭ گەكتارعا جەتكەنىن اكىم العا تارتتى.
جەتىسۋ وبلىسى اكىمى پرەزيدەنتكە اقسۋ قانت زاۋىتىنا تولىق جوندەۋ جۇرگىزىلىپ، ىسكە قوسىلعانى تۋرالى ايتتى. كوكسۋ قانت زاۋىتى 70 مىڭ توننا قانت وندىرگەن. بۇگىندە ەكى قانت زاۋىتى 280 شارۋاشىلىقتان 205 مىڭ توننادان استام شيكىزات قابىلداعان. ونىڭ 56 مىڭ تونناسى وڭدەلىپ، 7 مىڭ توننا قانت الىنعان. كەزدەسۋدە وبلىس باسشىسى ايماقتاعى سۋ جۇيەسىن قايتا جاڭارتۋ جانە سالۋ ءۇشىن 22 جوبانىڭ ىسكە اسىرىلىپ جاتقانى تۋرالى باياندالدى. ال 22 ەلدى مەكەن، سونىڭ ىشىندە تالدىقورعان قالاسىنا گاز قۇبىرى تارتىلىپ، 288 مىڭ ادام كوگىلدىر وتىنمەن قامتىلعان. بيىل 20 ەلدى مەكەندە قۇرىلىس-مونتاجداۋ جۇمىستارى جۇرگىزىلىپ جاتىر.
جەتىسۋ وبلىسىندا 2023-2025 جىلدارى 8،8 مىڭ ورىندىق 16 جاڭا مەكتەپ سالۋ جوسپارلانعان، سونىڭ ىشىندە 6600 ورىندىق 7 وقۋ ورداسى «جايلى مەكتەپ» ۇلتتىق جوباسى اياسىندا سالىنادى جانە 1800 ورىندىق 2 مەكتەپتىڭ قۇرىلىسى بيىل باستالعان. ال دەنساۋلىق ساقتاۋ سالاسى بويىنشا 8 نىساننىڭ قۇرىلىسى جۇرگىزىلىپ جاتىر. جەرگىلىكتى بيۋدجەت ەسەبىنەن 21 بلوكتى-مودۋلدى كەشەن سالىنعان. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2025 جىلعا دەيىن تاعى 59 نىسان سالۋ جوسپارلانعان.
مادەنيەت سالاسىندا 5 نىساننىڭ قۇرىلىسى جۇرگىزىلىپ، تاعى 8 نىسان كۇردەلى جوندەۋدەن وتكىزىلىپ جاتىر. سونىمەن قاتار بيىل وبلىستا 14 سپورت نىسانى سالىنىپ جاتقانى جونىندە ايتتى. سونىمەن بىرگە جەرگىلىكتى بيۋدجەت ەسەبىنەن 3 بلوكتى-مودۋلدى كەشەن سالىنادى. ال دەمەۋشىلەر ەسەبىنەن تالدىقورعان قالاسىندا جىل بويى جۇمىس ىستەيتىن «Jetysu اrena» جابىق سپورت كەشەنى ىسكە قوسىلعان. بۇل كەشەنگە 867 ميلليون تەڭگە ينۆەستيسيا سالىنعان.
جەتىسۋ وبلىسىنداعى اۆتوموبيل جولدارىنىڭ جالپى ۇزىندىعى – 3 988 شاقىرىم. بيىل وبلىستىق ماڭىزى بار 221 شاقىرىم جول مەن 73 ەلدى مەكەندەگى 249 شاقىرىم اۋىلىشىلىك جولداردى سالۋ جانە قايتا جاڭارتۋ جۇمىستارى جۇرگىزىلۋدە.
قاسىم-جومارت توقايەۆ وبلىستىڭ دامۋ قارقىنىن وڭ باعالاپ، وسى باعىتتاعى جۇمىستاردى ودان ءارى جالعاستىرۋدى تاپسىردى.
