وتىرىستىڭ رەسمي كۇن تارتىبىنە سايكەس باتىس قازاقستان وبلىسى بويىنشا پقباي ديرەكتورى س.س. ىزمۇحانبەتوۆانىڭ «قاشىقتىق جاعدايىندا پەداگوگ بىلىكتىلىگىن ارتتىرۋ: بۇگىنى مەن ەرتەڭى»، پاۆلودار وبلىسى بويىنشا پقباي ديرەكتورى ر.د. اشىمبەتوۆانىڭ «پەداگوگتەردىڭ بىلىكتىلىگىن ارتتىرۋ جۇيەسىندەگى قاشىقتىقتان وقىتۋدى ۇيىمداستىرۋ پراكتيكاسى» تاقىرىپتارى بويىنشا باياندامالارى تىڭدالدى.
دۇنيەجۇزىلىك پاندەمياعا بايلانىستى تۋىنداعان كۇردەلى جاعدايدا «ورلەۋ» باۇو» اكسيونەرلىك قوعامىنىڭ وڭىرلىك فيليالدارىنداعى وقىتۋشىلار، مازمۇنى جاڭارتىلعان ءبىلىم بەرۋ باعدارلاماسى بويىنشا ترەنەرلەر مەن مامانداردىڭ اتقارعان ەڭبەگىنىڭ جەمىستى ناتيجەلەرى دە جىكتەلدى.
اتاپ ايتساق، پەداگوگتەردىڭ بىلىكتىلىگىن ارتتىرۋ كۋرستارىنا قاتىسقان تىڭداۋشىلار ءارتۇرلى پلاتفورمالاردا جۇمىس جاساۋدى، ونلاين وقىتۋ پروسەسىندەگى ءتۇرلى رەسۋرستاردى ۇتىمدى پايدالانۋدى ۇيرەنىپ، سيفرلىق ورتادا كاسىبي داعدىلارىن قالىپتاستىرۋعا مۇمكىندىك الدى.
سونىمەن قاتار فيليال قىزمەتكەرلەرى فەيسبۋك، ينستاگرام سىندى الەۋمەتتىك جەلىلەردە ۆەبينار، ونلاين-كەزدەسۋ، سەمينارلار ۇيىمداستىرىپ، پەداگوگككە ادىستەمەلىك قولداۋ كورسەتۋ جۇمىستارى ۇزدىكسىز جۇرگىزىلۋدە. ءپان مۇعالىمدەرى ءۇشىن وقۋ جىلىنىڭ ءاربىر توقسانىنا ارنالعان بەينەساباقتار ازىرلەنىپ، «ورلەۋ» ءبىلىم كانالىنا ورنالاستىرىلعانى، بۇدان باسقا دا ادىستەمەلىك رەسۋرستار مەن ولاردىڭ سىلتەمەلەرى فيليال سايتتارى ارقىلى مۇعالىمدەرگە قولجەتىمدىلىگى قامتاماسىز ەتىلگەن.
اتقارىلعان جۇمىس قانشالىقتى اۋقىمدى بولسا، كەلەشەكتە ەڭسەرەر مىندەتتىڭ ودان دا ەرەسەن ەكەندىگىن باعامداعان «ورلەۋ» باۇو» اق باسشىلىعى پاندەميانىڭ تىعىرىعىنا تەجەلىپ قالماي، ۇستازداردىڭ بىلىكتىلىگىن ارتتىرۋ ساپاسىن جاڭا ساتىعا كوتەرۋ ماقساتىندا مۇعالىمدەرگە ارنالعان پاندىك كۋرستاردى جانداندىرۋ، ۇلگەرىمى ناشار وقۋشىلاردى وقىتۋدىڭ ءتيىمدى ادىستەرىن زەردەلەپ، تاجىريبەگە ۇسىنۋ مىندەتتەرىن بەلگىلەدى.
پ.اسىلبەك
