“قارۋمەن قاتار كۇرەكتى دە ۇستاي الامىن”. "توقايەۆتىڭ كۇزەتشىسى" كوپشىلىكتىڭ سىنىنا جاۋاپ بەردى

قاراكوز امانتاي 09 اقپ. 2024 21:05 4411

ورتالىق كوممۋنيكاسيالار قىزمەتىندە وتكەن بريفينگتە توتەنشە جاعدايلار ءمينيسترى شىڭعىس ءارىنوۆ جۇمىسىنا كۇمانمەن قارايتىن ب ا ق وكىلدەرىنىڭ سىنىنا جاۋاپ بەردى، دەپ حابارلايدى Dalanews.kz.

“ءسىز 18 جىل بويى كۇزەت قىزمەتىندە جۇمىس ىستەپ، قولىڭىزعا قارۋ ۇستادىڭىز. ەندى توتەنشە جاعدايلار مينيسترلىگىندە قولىڭىزعا كۇرەك ۇستاۋعا تۋرا كەلەدى. سەبەبى وبلىس وڭىرلەرىن كوكتەمدە سۋ باسۋ ءقاۋپى بار. سول ماسەلەنى شەشۋگە دايىنسىز با؟! بۇعان دەيىن وسى سالادا ىستەگەن مينيسترلەردىڭ قولىنان كەلمەگەن جۇمىستى دوڭگەلەتىپ الىپ كەتە الاسىز با؟” - دەپ سۇرادى جۋرناليست.

مينيستر بۇل سۇراققا قىسقاشا جاۋاپ بەردى.

“قارۋمەن قاتار كۇرەكتى دە ۇستادىق. باسقا دا قۇرالداردان حابارامىز بار. سوندىقتان ول جاعىنان تاجىريبەلىمىن دەپ ايتا الامىن. ەڭ باستىسى – جۇمىستىڭ ءبارىن ءوز ۋاقىتىندا ۇيىمداستىرۋ. دايىندىعىمىزدى ءىس جۇزىندە كورەرسىزدەر. سىن بولسا، سول كەزدە ايتاسىزدار”، - دەدى شىڭعىس ءارىنوۆ.

 

ەسكە سالايىق، 6 اقپاندا مەملەكەت باسشىسىنىڭ جارلىعىمەن شىڭعىس ءارىنوۆ قازاقستان رەسپۋبليكاسىنىڭ توتەنشە جاعدايلار ءمينيسترى بولىپ تاعايىندالعان بولاتىن. بۇعان دەيىن ول ق ر مەملەكەتتىك كۇزەت قىزمەتى باستىعىنىڭ ورىنباسارى — پرەزيدەنت كۇزەت قىزمەتىن اتقاردى.

سونىمەن قاتار شەنەۋنىككە 2022 جىلدىڭ مامىر ايىندا "ق ر مەملەكەتتىك كۇزەت قىزمەتىنىڭ گەنەرال-مايورى" ارنايى اتاعى بەرىلدى.


ۇسىنىلعان
سوڭعى جاڭالىقتار
x