Ortalyq komýnıkasıalar qyzmetinde ótken brıfıńte Tótenshe jaǵdaılar mınıstri Shyńǵys Árinov jumysyna kúmánmen qaraıtyn BAQ ókilderiniń synyna jaýap berdi, dep habarlaıdy Dalanews.kz.

“Siz 18 jyl boıy kúzet qyzmetinde jumys istep, qolyńyzǵa qarý ustadyńyz. Endi Tótenshe jaǵdaılar mınıstrliginde qolyńyzǵa kúrek ustaýǵa týra keledi. Sebebi oblys óńirlerin kóktemde sý basý qaýpi bar. Sol máseleni sheshýge daıynsyz ba?! Buǵan deıin osy salada istegen mınıstrlerdiń qolynan kelmegen jumysty dóńgeletip alyp kete alasyz ba?” - dep surady jýrnalıs.

Mınıstr bul suraqqa qysqasha jaýap berdi.

“Qarýmen qatar kúrekti de ustadyq. Basqa da quraldardan habaramyz bar. Sondyqtan ol jaǵynan tájirıbelimin dep aıta alamyn. Eń bastysy – jumystyń bárin óz ýaqytynda uıymdastyrý. Daıyndyǵymyzdy is júzinde kórersizder. Syn bolsa, sol kezde aıtasyzdar”, - dedi Shyńǵys Árinov.

 

Eske salaıyq, 6 aqpanda Memleket basshysynyń Jarlyǵymen Shyńǵys Árinov Qazaqstan Respýblıkasynyń Tótenshe jaǵdaılar mınıstri bolyp taǵaıyndalǵan bolatyn. Buǵan deıin ol QR Memlekettik kúzet qyzmeti bastyǵynyń orynbasary — Prezıdent kúzet qyzmetin atqardy.

Sonymen qatar sheneýnikke 2022 jyldyń mamyr aıynda "QR Memlekettik kúzet qyzmetiniń general-maıory" arnaıy ataǵy berildi.