بۇعان دەيىن كتك تەلەارناسى شارۋالاردىڭ ساپارى اۋىل شارۋاشىلىعى مينيسترلىگىنىڭ شەنەۋنىكتەرى ءۇشىن كۇتپەگەن جاعداي بولعانىن حابارلاعان بولاتىن.
ماڭعىستاۋ وبلىسىنان كەلگەن شارۋا ادىلبەك ساعىندىقوۆ قاراشوكەيەۆتىڭ قىزمەتىنەن كەتىپ، كاسىبي مامانعا جول بەرۋگە مىندەتتى ەكەنىن مالىمدەگەن بولاتىن.
"ورنىڭىزدان كەتۋىڭىز كەرەك. ال ءسىزدىڭ ورنىڭىزعا حالقىنا جانى اشيتىن جاقسى مامان تابۋ كەرەك. رەنجىمەڭىز، ءبىراق ماڭعىستاۋ تۇرعىندارى ءسىزدىڭ جۇمىسىڭىزعا كوڭىلدەرى تولماعاندىقتان اشۋلى. ءبىزدىڭ قالاۋىمىز – تەزىرەك ارەكەت ەتىپ، ايماققا قولداۋ كورسەتۋلەرىڭىز. قىستىڭ ەكى ايى عانا قالدى، امان وتۋگە كومەكتەسىڭىز. وتكەن جىلمەن سالىستىرساق، ماڭعىستاۋدا مالدىڭ تەك تورتتەن ءبىرى عانا قالدى. ەگەر قالعان مال باسى اقتوبەگە نەمەسە ورالعا ساتىلدى دەسەم، وتىرىك ايتقانىم ەمەس"، – دەدى ماڭعىستاۋلىق فەرمەر ادىلبەك ساعىندىقوۆ.
مينيستر ورتالىق كوممۋنيكاسيالار قىزمەتىندەگى باسپا ءسوز كونفەرەنسياسى بارىسىندا ءتورت ساعات بويى شارۋالارمەن كەزدەسۋ وتكىزىپ، ولارعا قاجەت قولداۋ شارالارى تۋرالى اڭمىلەسكەنىن ايتتى.
"مەن ۇكىمەت مۇشەسى بولسام دا، مەنىڭ تاعايىندالۋىم نەمەسە وتستاۆكاعا كەتۋىم تۋرالى شەشىمدى باسشىلىق قابىلدايدى"، – دەپ جاۋاپ بەردى مينيستر.
ايتا كەتەيىك، ماڭعىستاۋلىق شارۋالار جازعى قۇرعاقشىلىق پەن مالدىڭ جاپپاي قىرىلۋىنان كەيىن مەملەكەتتىڭ دۇرىس قولداۋ كورسەتپەگەنىنە نارازىلىقتارىن ءبىلدىردى.
فەرمەرلەر قىرىلعان مالدى قايتا ساناۋدى تالاپ ەتىپ وتىر. ولار ولگەن مالدىڭ سانى 1700-دەن كوپ ەكەنىن ايتۋدا. سونداي-اق شارۋالار جەمنىڭ قۇنى جوعارى ەكەنىن مالىمدەدى. ءتىپتى ەڭ قىمبات ءشوپ – ماڭعىستاۋ وبلىسىندا كورىنەدى. ەگەر وسىلاي جالعاسا بەرسە، قىستا ايماقتاعى قالعان مال قايتا قىرىلاتىنىن ءسوز قىلدى. شارۋالار شەنەۋنىكتەردەن ماسەلەگە شۇعىل ارالاسىپ، باعانىڭ تومەندەۋىن قولعا الۋدى سۇراپ وتىر.
