ولجاس بەكتەنوۆ جىلۋ كوزدەرىن جاڭعىرتۋ قارقىنىنا قاتىستى اكىمدىكتەر جۇمىسىنداعى ولقىلىقتارعا توقتالدى، دەپ حابارلايدى Dalanews.kz.
سەمەي قالاسىندا قازاندىقتاردى جوندەۋ جۇمىستارى ءالى باستالماعان. ال ماڭعىستاۋ وبلىسىندا "ماەك-تىڭ" 2ء-شى جىلۋ ورتالىعىنداعى تۋربينانى جوندەۋ تاجىريبەسى جوق قۇرىلىس كومپانياسىنا بەرىلگەن.
قوستاناي وبلىسىندا رۋدنىي جىلۋ ەلەكتر ورتالىعىنداعى تۋربينانى جوندەۋ 10 ساۋىردەن بەرى باستالعان جوق. ارقالىق جىلۋ ستانسياسىنداعى قازاندىق بويىنشا دا وسىنداي جاعداي قالىپتاسىپ وتىر. ۇلىتاۋ وبلىسى ساتبايەۆ قالاسىنداعى قازاندىقتاردى جوندەۋ جۇمىستارىنىڭ قارقىنى دا تىم باياۋ.
"مۇنداي كەمشىلىكتەر وڭىرلەردىڭ بارىندە دەرلىك كەزدەسەدى جانە ول ءتيىستى باقىلاۋ جوقتىعىن بىلدىرەدى. اكىمدىكتەر مينيسترلىكتەرگە سىلتەپ نەمەسە قاراجات جوقتىعىن، كونكۋرستاردى سىلتاۋراتىپ، بۇل جۇمىستى نازاردان تىس قالدىرۋعا بولمايدى. جىلىتۋ ماۋسىمىنا دايىندىق – اكىمدىكتەردىڭ الداعى ءۇش اي ىشىندەگى نەگىزگى مىندەتى"، - دەپ اتاپ ءوتتى پرەمەر-مينيستر.
ءوڭىر اكىمدىكتەرى كونكۋرستىق راسىمدەردى ەكى اپتا ىشىندە اياقتاپ، جوندەۋ جۇمىستارىنا ناقتى كىرىسۋى كەرەك.
"باسى ارتىق بيۋروكراتياعا جول بەرۋگە بولمايدى. بيىل ىسكە قوسۋ جوسپارلانىپ وتىرعان جاڭا جىلۋ نىساندارى بويىنشا بارلىق جۇمىستى تامىزدان كەشىكتىرمەي اياقتاۋ قاجەت. اكىمدەرگە جىلۋ نىساندارىنا اپتا سايىن بارىپ، جاعدايدى جەكە باقىلاۋعا الۋدى جانە بارلىق تۋىنداعان ءقاۋىپ بويىنشا شۇعىل ارەكەت ەتۋدى تاپسىرامىن"، - دەدى ولجاس بەكتەنوۆ.
