قاراعاندى وبلىسىندا جان تۇرشىگەرلىك وقيعا ورىن الدى: 15 جاستاعى ءجاسوسپىرىم قىزدى وگەي اكەسى 38 جاستاعى ەر ادامعا كۇشتەپ تۇرمىسقا بەرگەن. ءقازىر وقيعا بويىنشا تەرگەۋ ءجۇرىپ جاتىر، ال قىزدىڭ اناسى مەن وگەي اكەسىنە اتا-انا قۇقىعىنان ايىرۋ تۋرالى تالاپ-ارىز بەرىلدى، دەپ حابارلايدى Dalanews.kz ينفورمبيۋروعا سىلتەمە جاساپ.

قىزدىڭ تۋعان اكەسىنىڭ ايتۋىنشا، 13 ناۋرىزدا قىزى كۇيەۋىنەن قاشىپ، كومەك سۇراپ ونىڭ ۇيىنە كەلگەن. ەر ادامنىڭ سوزىنە قاراعاندا، ءجاسوسپىرىم ءتورت كۇن بويى ەركىنەن تىس ۇستالعان. وسىدان كەيىن اكەسى پوليسياعا ارىز جازعان. كۇدىكتى ءقازىر ۋاقىتشا تەرگەۋ يزولياتورىنا قامالدى.

"مەن بالالارىمدى ءوزىمنىڭ قامقورلىعىما العىم كەلەدى. ۇلىم دا، قىزدارىم دا كامەلەتكە تولماعان. مەن ولاردىڭ ومىرىنە ءقاۋىپ ءتونىپ تۇرعان ۇيدە تۇرۋىن قالامايمىن. ءتىپتى كەنجە قىزىمنىڭ وزىنە دە: “سەنى كەيىن كۇيەۋگە بەرەمىز” دەگەن ەكەن. بۇل – وتە قورقىنىشتى جاعداي"، – دەيدى قىزدىڭ تۋعان اكەسى.

ونىڭ ايتۋىنشا، وگەي اكەسىنىڭ ۇيىنەن تىيىم سالىنعان ءدىني ادەبيەتتەر دە تابىلعان. قازىرگى تاڭدا ءتورت بالا ۋاقىتشا اكەسىنىڭ قامقورلىعىنا بەرىلدى. الايدا اناسىنىڭ قازىرگى كۇيەۋىنەن تاعى ەكى كىشكەنتاي بالاسى بار. وسىلايشا اباي اۋدانىنىڭ قامقورشىلىق ورگانى التى بالاعا قاتىستى اتا-اناسىن قۇقىعىنان ايىرۋ جونىندە سوتقا تالاپ-ارىز تۇسىرگەن.

"بالا نەكەگە وتىرعانىن كامەلەتكە تولماعاندار ءىسى جونىندەگى كوميسسيا وتىرىسىندا ءوزى ايتىپ بەردى. بەس كۇن بويى ۇيىندە بولماعان قىزعا اناسى ىزدەۋ جاريالاماعان. وسى سەبەپتى سوتقا ارىز بەرۋ تۋرالى شەشىم قابىلداندى"، – دەيدى اباي اۋدانى ءبىلىم ءبولىمىنىڭ باس مامانى مارينا سترەلنيكوۆا.

ءجاسوسپىرىم قىز الماتىداعى جەكەمەنشىك مەكتەپتە ونلاين وقىعان جانە حيدجاب كيگەن. الايدا اكەسىنىڭ ۇيىنە كەلگەن سوڭ ورامال تاعۋدان باس تارتقان. قامقورشىلىق ورگاندارى بۇل – قىزدىڭ بۇرىنعى وتباسىندا ءدىني قىسىم كورگەنىنىڭ دالەلى دەپ وتىر.

قىزدىڭ ناعاشى اتاسى – اناسىنىڭ اكەسى – نەمەرەسىن قورعاۋعا شىققان.

"ءيا، مەن بارلىق كىنالىنىڭ زاڭ جۇزىندە جازالانۋىن قالايمىن، ءتىپتى ءوز قىزىم دا. بۇل – مەنىڭ جۇرەگىمە اۋىر، ءبىراق ولار نەمەرەمدى ساتىپ جىبەردى. ءبىز كۇيەۋ بالام ەكەۋمىز بالالاردى ءوزىمىز باعا الامىز"، – دەيدى ول.

قىزدىڭ اكەسىنىڭ ايتۋىنشا، اناسى مەن وگەي اكەسى وعان ارىزدان باس تارتۋ ءۇشىن قىسىم كورسەتكەن. الايدا مەديسينالىق ساراپتاما زورلىقتىڭ بولعانىن راستاعان. ەندى قىلمىستىق ءىس بويىنشا سوت وتىرىسى تاياۋ ۋاقىتتا وتەدى.