Qaraǵandy oblysynda jan túrshigerlik oqiǵa oryn aldy: 15 jastaǵy jasóspirim qyzdy ógei ákesi 38 jastaǵy er adamǵa kúshtep turmysqa bergen. Qazir oqiǵa boiynsha tergeý júrip jatyr, al qyzdyń anasy men ógei ákesine ata-ana quqyǵynan aiyrý týraly talap-aryz berildi, dep habarlaidy Dalanews.kz Informbiýroǵa silteme jasap.
Qyzdyń týǵan ákesiniń aitýynsha, 13 naýryzda qyzy kúieýinen qashyp, kómek surap onyń úiine kelgen. Er adamnyń sózine qaraǵanda, jasóspirim tórt kún boiy erkinen tys ustalǵan. Osydan keiin ákesi politsiiaǵa aryz jazǵan. Kúdikti qazir ýaqytsha tergeý izoliatoryna qamaldy.
"Men balalarymdy ózimniń qamqorlyǵyma alǵym keledi. Ulym da, qyzdarym da kámeletke tolmaǵan. Men olardyń ómirine qaýip tónip turǵan úide turýyn qalamaimyn. Tipti kenje qyzymnyń ózine de: “Seni keiin kúieýge beremiz” degen eken. Bul – óte qorqynyshty jaǵdai", – deidi qyzdyń týǵan ákesi.
Onyń aitýynsha, ógei ákesiniń úiinen tyiym salynǵan dini ádebietter de tabylǵan. Qazirgi tańda tórt bala ýaqytsha ákesiniń qamqorlyǵyna berildi. Alaida anasynyń qazirgi kúieýinen taǵy eki kishkentai balasy bar. Osylaisha Abai aýdanynyń qamqorshylyq organy alty balaǵa qatysty ata-anasyn quqyǵynan aiyrý jóninde sotqa talap-aryz túsirgen.
"Bala nekege otyrǵanyn kámeletke tolmaǵandar isi jónindegi komissiia otyrysynda ózi aityp berdi. Bes kún boiy úiinde bolmaǵan qyzǵa anasy izdeý jariialamaǵan. Osy sebepti sotqa aryz berý týraly sheshim qabyldandy", – deidi Abai aýdany bilim bóliminiń bas mamany Marina Strelnikova.
Jasóspirim qyz Almatydaǵy jekemenshik mektepte onlain oqyǵan jáne hidjab kigen. Alaida ákesiniń úiine kelgen soń oramal taǵýdan bas tartqan. Qamqorshylyq organdary bul – qyzdyń burynǵy otbasynda dini qysym kórgeniniń dáleli dep otyr.
Qyzdyń naǵashy atasy – anasynyń ákesi – nemeresin qorǵaýǵa shyqqan.
"Iá, men barlyq kináliniń zań júzinde jazalanýyn qalaimyn, tipti óz qyzym da. Bul – meniń júregime aýyr, biraq olar nemeremdi satyp jiberdi. Biz kúieý balam ekeýmiz balalardy ózimiz baǵa alamyz", – deidi ol.
Qyzdyń ákesiniń aitýynsha, anasy men ógei ákesi oǵan aryzdan bas tartý úshin qysym kórsetken. Alaida meditsinalyq saraptama zorlyqtyń bolǵanyn rastaǵan. Endi qylmystyq is boiynsha sot otyrysy taiaý ýaqytta ótedi.
