سان الۋان كاسىپتىڭ ىشىندەگى ەڭ جاۋاپتى ءارى ەڭ قاستەرلى ماماندىق يەلەرى – دارىگەرلەر ەكەنى ءسوزسىز. مەديسينا ماماندارىنىڭ ەڭبەگى ەلەنۋگە تۇرارلىق جانە ۇلكەن جاۋاپكەرشىلىك پەن جانكەشتىلىكتى تالاپ ەتەدى. ودان وزگە، ءبىر دە ءبىر ماماندىققا ادام ءومىرى مۇنشالىقتى تاۋەلدى ەمەس. بيىل قازاقستان رەسپۋبليكاسى تاۋەلسىزدىگىنىڭ 30 جىلدىعىمەن تۇسپا – تۇس كەلگەن مەرەيلى مەرەكە قارساڭىندا، كارانتين ەرەجەلەرىن ساقتاي وتىرىپ ءاربىر ناۋقاستىڭ جان قينالىسىن ءوز بويلارىنان وتكىزىپ جۇرگەن مەديسينا سالاسىنىڭ قىزمەتكەرلەرىنە اۋدان اكىمى ا.ابدينوۆ سالتاناتتى قابىلداۋ وتكىزدى.
- «ءبىرىنشى بايلىق – دەنساۋلىق» دەپ دانا حالقىمىزدىڭ ءسوزى بەكەر ايتىلماعان. اۋىرساق ءتانىمىزدى ەمدەپ، جانىمىزعا شيپا سىيلايتىن دارىگەرلەر قۇرمەت تۇتۋعا لايىقتى جاندار. ولاردىڭ تاۋلىك بويى كوز ىلمەي، تاۋەكەلگە بەل بۋىپ، تىنىمسىز كەشەتىن تىرلىگىن جانكەشتىلىك دەپ باعالاۋ كەرەك. مەملەكەت باسشىسى قاسىم-جومارت كەمەل ۇلى توقايەۆ ءوزىنىڭ ۇلىقتاۋ راسىمىندە دارىگەرلەردىڭ مارتەبەسىن كوتەرىپ، ماسەلەلەرىن شەشۋ كەرەكتىگىن اتاپ وتكەن بولاتىن. بۇل مەملەكەتتىڭ ەل مەديسيناسىنا كورسەتەر قولداۋى زور ەكەنىن بىلدىرەدى. ءوز كەزەگىندە دەنساۋلىق ساقتاۋ ماماندارى دا ازاماتتارعا ساۋاتتى، ساپالى قىزمەت كورسەتۋ كەرەك ەكەنىن ۇمىتپاعان ءجون،-دەدى اۋدان اكىمى ا.ابدينوۆ.
سالتاناتتى شارادا ەڭبەگىمەن دارالانعان 22 اق جەلەڭدى ابزال جانداردى قۇرمەت گراموتاسى جانە العىس حاتتارمەن ماراپاتتاپ، اۋدان تۇرعىندارى اتىنان العىسىن ءبىلدىردى.
ءار ناۋقاستىڭ جانىنا داۋا بولىپ، ساۋلىعىن نىعايتىپ، ادام بويىنا ومىرلىك كۇش – قۋات بەرىپ، جىگەرىن جانداراتىن – اق حالاتتى ابزال جانداردىڭ ەڭبەگى ءار ۋاقىتتا ەلەۋلى.
مەرەكەلەرىڭىزبەن ابزال جاندار!
